Kosovë

Beogradi konfirmon rinisjen e dialogut të martën

Ai ka thënë se është i gatshëm të punojë për gjetjen e zgjidhjes sa i përket përfaqësimit rajonal të Kosovës, duke pasur parasysh, siç është shprehur, “ekskluzivisht Rezolutën 1244, Kushtetutën e Serbisë dhe interesin kombëtar”.

“Mund të konfirmoj zyrtarisht se ekipi ynë negociues do të shkojë në Bruksel të martën, më 21 shkurt, për vazhdimin e dialogut me Prishtinën”, ka thënë Stefanoviç për mediat në Beograd.

Ai shtoi se pason “një proces i trazuar negociator”, për të cilin ka shfaqur shpresën se do të rezultojë me zgjidhje pozitive, që do të çonte deri te “përfaqësimi adekuat” i Prishtinës në nismat rajonale, si dhe “do të mundësonte vazhdimin e integrimit evropian të Serbisë”.

Në anën tjetër, kryeministri i Kosovës, Hashim Thaçi, ka thënë të dielën për “Radion Evropa e Lirë” se Kosova, në bashkëpunimin rajonal do të përfaqësohet me Deklaratën e Pavarësisë, opinionin e Gjykatës Ndërkombëtare të Drejtësisë dhe me Rezolutën 12 44 të Kombeve të Bashkuara.

Mosmarrëveshjet rreth përfaqësimit rajonal të Prishtinës, që buronin nga këmbëngulja e Kosovës në shtetësi dhe e Serbisë në Rezolutën 1244, kanë shkaktuar ndërprerjen e dialogut teknik mes dy palëve.

Zgjidhja për këtë çështje mbetet kusht për Serbinë, për të fituar përgjigje pozitive rreth statusit të kandidatit për anëtarësim në Bashkimin Evropian.
/rfe/

•  
•