Kosovë

A është shuar SHIK-u?

E hëne 6 Shkurt 2012 22:54

 

Zyrtarët e kësaj të fundit, thonë se SHIK-u, si shërbim informativ i afërt me PDK-në, është ende duke funksionuar.

Javëve të fundit, sipas zyrtarëve të Vetëvendosjes, aktiviteti i SHIK-ut është shtuar dukshëm si në përcjellje e përgjime, po ashtu edhe në propagandë.

Deputeti i subjektit politik Vetëvendosje, Rexhep Selimi, tha për Radion Evropa e Lirë se ky shërbim i fshehur i Partisë Demokratike është ende duke funksionuar.

“Në seancën e fundit iu kam drejtuar edhe opinionit edhe Kuvendit, e sidomos atyre që kanë nxjerrë këso temash në opinion, që të mos e lodhin opinionin e Kosovës dhe opinionin shqiptar me këso temash dhe të mos i ngarkojnë institucionet e Kosovës, përfshirë edhe Kuvendin Kosovës, me tema dhe çështje të shërbimeve sekrete. Përderisa kjo po vazhdon të ndodh, akoma edhe një herë rikonfirmoj që SHIK-u është aktiv”, u shpreh Selimi.

Mirëpo, këto deklarata i ka hedhur poshtë shefi i Grupi Parlamentar të PDK-së Adem Grabofci.

Shërbimi Informativ ka një datë të veprimit të vet dhe ka datën e përfundimit.

Ai deklaroi se tashmë dihet qartë data e fillimit dhe e përfundimit të punës së Shërbimit Informativ të Kosovës (SHIK).

“Shërbimi Informativ ka një datë të veprimit të vet dhe ka datën e përfundimit. Do të thotë, janë deklaratat kur ka filluar së vepruari dhe kur ka deklaruar se ka përmbyllur veprimtarinë. Prandaj këtu mendoj se çdo gjë është e qartë në ketë drejtim”, theksoi Grabofci.

Në qershor të vitit 2008, shefi i këtij shërbimi, Kadri Veseli, kishe shpallur përfundimin e aktiviteteve të këtij mekanizmi.

Shuarja zyrtare e SHIK-ut ishte parë edhe nga ndërkombëtarët si një kusht i domosdoshëm për t’i lëshuar vendin strukturës së re të inteligjencës së Kosovës, Agjencia Kosovare e Inteligjencës.

Ditë më parë, deputeti Bekim Haxhiu, publikisht kishte deklaruar se Albin Kurti duhet të japë sqarime deri më 9 shkurt për disa takime me serbë, dhe korrespodenca me vajzën e një ish-ministri të Sllobodan Millosheviqit.

Pas kësaj deklarate, deputeti Rexhep Selimi, javën e kaluar foli në Kuvend duke iu përgjigjur “ultimatumit” të deputetit të PDK-së.

Qeveria dhe SHIK-u kanë nxjerrë sërish edhe agjentët në skenë për të bërë presione e shantazhe ndaj qytetareve dhe personaliteteve.

“Qeveria dhe SHIK-u kanë nxjerrë sërish edhe agjentët në skenë për të bërë presione e shantazhe ndaj qytetareve dhe personaliteteve. Ne nuk flasim me gjuhë spiunesh e agjentësh, madje nuk flasim fare me ta. Por ne, kemi një mesazh për Qeverinë dhe për SHIK-un, të cilët po bashkëjetojnë në pushtetin me vota të grabitura: Nëse mendoni se mund t’i bëni dikujt presion e ta shantazhoni me afatizime, e keni gabim. Nëse doni që t’i frikësoni të tjerët me presione, prapë e keni gabim, s’ua ka frikën kush. Por nëse doni ta mbani pushtetin dhe ta ndërroni me njëri-tjetrin postin kryeministrit, prapë e keni gabim, tashmë është tepër vonë për ju”, pati deklaruar Selimin në njërën nga seancat e Kuvendit.

Nuk është hera e parë që në Kosovë shpërthen debati për shërbimet informative, ndërkohë që partitë politike akuzojnë njëra-tjetrën se përmes shërbimeve të tilla janë përfshirë në veprime kriminale.

Disa deputetë të Kuvendit të Kosovës kanë pranuar haptas se kanë qenë anëtarë të Shërbimit Informativ të Kosovës.

Kryetari i partisë me të madhe opozitare Isa Mustafa, ka kritikuar të hënën partinë në pushtet se “me infiltrimin e SHIK-ut në institucione si në Kuvendi i Kosovës, po i shantazh deputetëve”.

Sipas Mustafës, këto veprime janë të papranueshme, që SHIK-u të kontrollojë institucionet dhe të krijojë klimë mosbesimi në mesin e qytetarëve në vend.

Edhe Burim Ramadani, deputet i Kuvendit të Kosovës nga radhët e Aleancës për Ardhmërinë e Kosovës, konsideron se çfarëdo rrjete dhe struktura të sigurisë dhe inteligjencës në Kosovë, përveç Agjencisë Kosovare për Inteligjencë, janë ilegale dhe kriminale.

Ai fton prokurorinë e shtetit që të merret me hetimin e asaj që thuhet se ekzistojnë shërbime të fshehura të partive politike në vend.

“Këto debate janë dëshmi e fuqishme se shërbimet e tilla nuk kanë përfunduar, pra nuk janë shuar, dhe kjo e vërteton edhe raportin e Komisionit Evropian, në Raportin e Progresit, që thotë se partitë politike kanë rrjete të sigurisë. I bëj thirrje prokurorisë që të merret me këto raste, sepse edhe më tutje po e dëmtojnë funksionalitetin e shtetit”, u shpreh Ramadani.

Aktualisht, në Kosovë, i vetmi institucion legal i shërbimit informativ është AKI-ja.

Kushtetuta e Kosovës parasheh që Agjencia e Kosovës për Inteligjencë të zbulojë, hetojë dhe mbikëqyrë kërcënimet ndaj sigurisë në Republikën e Kosovës.