Maqedoni

Ahmeti: Vota e Maqedonisë, kundër rezolutës serbe

E hëne 6 Shtator 2010 13:32

 

Euroskepticizmit të kryeministrit maqedonas Nikolla Gruevskisë fundmi i është kundërpërgjigjur lideri i BDI-zë, Ali Ahmeti. Në një konferencë me gazetarë, ku u shtrua edhe iftari, ai theksoi se Maqedonia “patjetër të vazhdojë rrugën e

integrimit dhe se BE-ja dhe NATO janë rruga jonë e vetme”.

Në pyetjen nëse ka informata se si do të votojë Maqedonia në Asamblenë e Përgjithshme të KB-ve për rezolutën serbe për Kosovën, lideri i BDI-së tha se kjo votë duhet të jetë kundër. “Pa dilemë se Maqedonia duhet të votojë kundër. Me njohjen e pavarësisë së Kosovës dhe me vendosjen e marrëdhënieve diplomatike mes dy shteteve, kjo çështje veç më është e njohur”, ka thënë ai.

Gjatë këtij brifingu me gazetarë, Ahmeti theksoi se gjatë viteve 1995/96 është folur për ndarjen e Maqedonisë, por përsëri në vitin 2001 kishte ofertë për ndarje, por ai nuk e ka

pranuar.

“Sipas kësaj oferte, Zajazi tani do të ishte Shqipëri, por unë nuk jam i interesuar për

harta të reja, por jam i interesuar të jemi gjithë të barabartë, dhe ju jeni dëshmitarë për këtë. Gjatë bisedave edhe unë e kam paraqitur konceptin tim, se ky vend është i imi, dhe ky shtet është i imi. Pra, mua më brengos që të mos ketë rryma të ndryshme të iniciojë ose të ndikojnë në prishjen e marrëdhënieve ndëretnike që do të sjellin deri në ndarje”, ka shtuar ai./koha/