Sport

Barazon Inter, Milani dhe Roma pësojnë humbje

E mërkure 1 Shkurt 2012 23:13

Lazio iu është hakmarrur Milanit për eliminimi nga Kupa e Italisë, duke e mposhtur me rezultat 2-0.

Pjesa e parë u mbyll pa gola, ku të dyja skuadrat ishin të kujdesshme në veprimet e tyre.

Në pjesën e dytë edhe pse Milani bëri zëvendësime nuk arriti të shënoi. Ishte Lazio ajo që shënoi gol. Hernanes fillimisht kaloi në epërsi Lazion në minutën e 76-të, kurse vetëm disa minuta më vonë (85’), Tommaso Rocchi dyfishoi epërsinë në 2-0 që ishte dhe rezultati përfundimtar i takimit.

Interi ka barazuar me Palermon në një dule epik 4-4, ku shënonte njëra e barazonte tjetra. Fillimisht shënuan mysafirët me anë të Andrea Mantovanit (17’), mirëpo Diego Milito e barazoi rezultatin (22’) dhe me rezultat identik skuadrat shkuan në pushim.

Fabrizio Miccoli riktheu avantazhin e sicilianëve (52’), por aty ishte Milito për të barazuar sërish, kësaj radhe nga penaltia (55’).

Në minutën e 61-të, argjentinasi kompletoi het-trikun e tij dhe kaloi për herë të parë vendasit në epërsi. Mirëpo, Fabrizio Miccoli si gjithmonë i gatshëm për t’ua vështirësuar punët kundërshtarëve (66’).

Superlojtari i mbrëmjes, Diego Alberto Milito, shënoi edhe golin e katërt personal për të kthyer avantazhin e zikaltërve. Megjithatë, më i miri te mysafirët, Fabrizio Miccoli, regjistroi het-trik dhe e nivelizoi sërish takimin.

Ndërkohë, Roma ka pësuar me rezultat 4-2 si mysafir i Cagliarit në Stadio Sant'Elia. Edhe pse Roma ishte në epërsi prej 2-1 nuk arriti ta mbroj këtë rezultat duke pranuar edhe tri gola tjera. Golat në këtë takim u shënuan nga Thiago Ribeiro (6’ dhe 49’), Mauricio Pinilla (41’) dhe Albin Ekdal (90’+2) shënuan për vendasit, ndërsa Juan (13’) dhe Fabio Borini (34’) shënuan për mysafirët.

Pas javës së 21, tabelës në Seria A i prinë Juventusi me 44 pikë(një ndeshje më pak), Milani 43, Udinese 41, Lazio 39, Interi 36./mesazhi/A.Bilalli/