Sport

Beqaj: Mund ta befasojmë Rumaninë

Portieri i rikthyer i kombëtares shqiptare, Arjan Beqaj, thotë se ai beson se kuqezinjtë mund të bëjnë befasi në takimin e sotëm eliminator për Euro 2012, pavarësisht se Rumania shihet si favorite.

E premte 3 Shtator 2010 17:54

"Është një ditë shumë e rëndësishme për skuadrën tonë dhe shpresojmë të japim më të mirën. Rumania është skuadër e fortë, pavarësisht problemeve që ka pasur kohët e fundit. Madje këto probleme mund t’i motivojnë më shumë përballë nesh".

"Dështimi në edicionin e kaluar eliminator e ka detyruar skuadrën rumune të bëjë shumë ndryshime. Eshtë ndërruar trajneri, kanë ardhur lojtarë të rinj, por duhet ta pranojmë që Rumania mbetet favorite. Shqipëria ka treguar se mund të bëjë surpriza. Shpresoj që kjo të ndodhë edhe me Rumaninë", ka thënë Beqaj në një intervisë për Sporti Shqiptar.

Skuadra shqiptare pritet të paraqitet e plotë në takimin e sotëm, me Beqajn në portë, Dallkun, Canën, Currin dhe Vangjelin në mbrojtje dhe pesëshen e mesfushës, Lila, Bulku, Duro, Skela dhe Agolli. Në sulm i vetëm pritet të dalë në fushë Bogdani.