Shqipëri

Berisha: Do të modernizojmë sistemin arsimor

Kryeministri Sali Berisha ka uruar nga Durrësi, nisjen e vitit të ri shkollor.

E hëne 6 Shtator 2010 13:55

"Arsimi është çështja më serioze e vendit dhe qeveria do të bëjë të gjithë përpjekjet për modernizimin e mëtejshëm të sistemit arsimor", u shpreh ai nga fshati Rrushkull në rrethin e Durrësit, ku mori pjesë në ceremoninë e përurimit të shkollës së re 9-vjeçare.

"Kjo është një ditë e shënuar për 650 mijë fëmijë dhe të rinj shkollarë, por dhe për mësuesit dhe prindët e tyre, një ditë e madhe për të gjithë shqiptarët," tha Berisha.

Sipas tij, ky është tregues i përpjekjeve të mëdha për ta bërë kombin shqiptar të mirëshkolluar, duke synuar zhvillimin e mëtejshëm të vendit. Në fjalën e tij, kreu i qeverisë ka përmendur edhe investimet që janë bërë në shkolla në të gjithë vendin, si kompjuterizimi, çuarja e internetit në çdo shkollë etj.