Rajon dhe Botë

Davutollu, një nga "Kisingerët" e botës

E enjte 11 Mars 2010 16:10

Ish-sekretari amerikan i Shtetit, Henri Kisinger është strategu kryesor i politikës së jashtme të SHBA-së në këto 50 vitet e fundit.

 

Ndërkohë “Foreign Policy”, pjesë e grupit “Washington Post-Newsweek”, ka shpallur katër strategët më me ndikim në politikën botërore, mes të cilëve edhe kryediplomati aktual i Turqisë.

 

“Në politikën e jashtme të një shteti, veç liderëve të zgjedhur, pas perdes qëndrojnë burra shteti të cilët vlerësohen me kalimin e kohës. Ashtu siç bëri Kisingeri me Shtetet e Bashkuara, në botë ekzistojnë edhe katër strategë të të njëjtit nivel”, shkruan prestigjiozja ndërkombëtare.

 

Si një nga katër “Kisingerët”, Davutollu vlerësohet lart për diplomacinë e tij. “Davutollu është një studiues i zellshëm i historisë, agresiv dhe njëkohësisht i sinqertë në ato që thotë. Duke vlerësuar të kaluarën e lavdishme të Perandorisë Osmane, ai beson në ringritjen e Turqisë në Lindjen e Mesme. Duke ndjekur udhëzimet e Davutollusë, Turqia ka forcuar marrëdhëniet me vendet arabe, dhe njëkohësisht është bërë ndërmjetësuese në bisedimet mes arabëve dhe izraelitëve”, shkruan Foreign Policy.

 

Revista citon edhe fjalët e kryediplomatit turk, sipas të cilit: “Turqia në Evropë është evropiane, dhe në Lindje është lindore, pasi i përket të dyja anëve”.

 

Përveç Davutollusë, në listën e katër “Kisingerëve” është ish-kryeministri i Singaporit në vitet 1959-1990, Li Kuan Jeu, nën udhëheqjen e të cilit ky vend arriti një mrekulli ekonomike.

 

Celso Amorim, kryediplomati i Brazilit, është një tjetër strateg i madh, nën udhëzimet e të cilit janë shkrirë akujt me vende të tilla komuniste si Venezuela dhe Kuba.

 

Ambasadori i Arabisë Saudite në Londër, Turki el-Fajsal plotëson katërshen e “Kisingerëve”, i cili ka luajtur një rol të jashtëzakonshëm pas ngjarjeve të 11 Shtatorit.