Bota Jonë

Dhjetë vjet Ardhmëri

E mërkure 21 Dhjetor 2011 23:05

Tiranë: Ditën e diel më datë 18 dhjetor Shoqata Kulturore Ardhmëria organizoi ceremoninë e 10-vjetorit të themelimit të saj të titulluar “Dekada e Parë” në prani të aktivistëve, miqve, dashamirësve , intelektualëve si dhe figurave të njohura publike.

Ceremonia që mblodhi mbi njëmijë të pranishëm u organizua në Teatrin Kombëtar të Operës dhe Baletit. I pari që çeli aktivitetin ishte kryetari i Shoqatës Ardhmëria z.Ferid Piku i cili në fjalën e tij u përqendrua në rëndësinë e misionit të shoqatës të cilën ai përfaqëson si dhe në përpjekjet e vazhdueshme për të jetësuar qëllimet për të cilat shoqata ekziston. Gjatë fjalës së tij ai shprehu një falënderim të veçantë për të gjithë aktivistët e shoqatës si dhe mbështetësit e saj që kanë ofruar ndihëm e tyre shumëplanëshe në zgjerimin e veprimtarisë së shoqatës dhe të impaktit të saj në shoqëri. Gjatë ceremonisë përcollën përshëndetjen e tyre dhe shprehën vlerësimin për punën e Shoqatës Ardhmëria edhe Kryetari i Bashkisë së Tiranës, z.Lulzim Basha, Ministri i Kulturës, Turizmit, Rinisë dhe Sporteve , z. Aldo Bumçi,kryetari i Komunitetit Musliman Shqipar, H. Selim Muça, si dhe publikçisti dhe profesori i mirënjohur kosovar, dr. Milazim Krasniqi.

Në takim ishin të pranishëm edhe përfaqësues të organizatave simotra nga rajoni, si Kosova, Mali i Zi, Presheva dhe Maqedonia. Mes panelit të ftuarve ishin dhe përfaqësues të shoqatave partnere nga Kuvajti dhe Turqia.

Pjesë e rëndësishme e ceremonisë ishte edhe akordimi i disa medaljeve në shenjë mirënjohjeje dhe vlerësimi për personalitete të njohura në fushën intelektuale si dhe për veprimtarët e parë të shoqatës që me mundin e tyre arritën të vënë gurët e themelit mbi të cilët u ngrit puna e shoqatës.

Një vend të veçantë gjatë ceremonisë zuri vlerësimi dhe nderimi i studentëve më të mirë që sapo kanë mbyllur studimet e larta. Ato janë një arsye e fortë për t’u ndjerë krenarë , jo vetëm për familjet e tyre dhe Shoqatën Ardhmëria që ka një kontribut sado modest në suksesin e tyre, por edhe për të gjithë të pranishmit.

Ceremonisë nuk i mungoi edhe dimensioni artistik. Interpretimet e artistit të popullit Mirush Kabashit, këngëtarit të mirënjohur Sidrit Bejleri dhe artistit të famshëm turk Vejsel Çelikdemir me pikturat e tij krejt origjinale në rërë përcollën një atmosferë emocionuese për të gjithë të pranishmit. /ardhmeriaonline/