Bota Jonë

Dr Kardavi vlerëson thirrjen për Union të shteteve të Gadishullit Arabik

E marte 27 Dhjetor 2011 22:35

Shejh Jusuf Elkardavi e vlerësoi maksimalisht thirrjen e monarkut të Arabisë Saudite për formimin e një Unioni të vendeve të Gadishullit Arabik, ashtu siç kritikoi Francën për projektligjin që kriminalizon mohimin e gjenocidit armen.

Gjatë hytbes së ditës së premte, shejh Kardavi vlerësoi përpjekjet që po bën mbretëria e Arabisë Saudite për formimin e një Unioni të vendeve të Gadishullit Arabik. Ai tha se këtë hap e mbështet logjika e shëndoshë por dhe Kurani dhe Tradita profetike. Ai shtroi pyetjen retorike: E përse të mos shndërrohen shtetete Gadishullit Arabik në një shtet të madh, i cili do të ketë ushtrinë e tij, monedhën, kushtetutën dhe tregun përkatës?”

Ai tha:”Nëse evropianët, të cilët janë vrarë me njëri-tjetrin duke lënë pas me miliona të vrarë gjatë Luftës së Dytë Botërore, arritën ta kapërcejnë këtë problem dhe të heshtin ndaj të kaluarës, për tu shndërruar në një vend të vetëm, përse të mos e bëjmë ne?”

Ai u bëri thirrje të gjithë qeverive të Gadishullit Arabik që ta mbështesin këtë iniciativë, pasi uniteti është një detyrë fetare dhe një domosdoshmëri të cilën na e imponon aktualiteti, sfidat dhe kërcënimet e jashtme.

Gjatë hytbes, ai nuk la pa cekur dhe konfliktin e fundit mes Turqisë dhe Francës, ku kjo e fundit miratoi një projektligj, sipas të cilit konsiderohet krim mohimi i genocidit ndaj armenëve. Ai tha se mbështet Turqinë në këtë çështje dhe se është kundër akuzimit të historisë islame për padrejtësi.

Ai tha se islami nuk e lejon marrjen e jetës të kujtdo qoftë. E si mund të lejohet shuarja e një popullate, ndërkohë që islami nuk lejon shuarjen e një specie kafshësh?! Kur disa myslimanë të Medines vendosën ti vrasin qentë rrugaçë, të cilët ishin shtuar shumë, Profeti a.s i ndaloi, duke u thënë se qentë ishin një specie e krijuar nga Zoti. Ai shtoi se deputetët francezë nuk janë të aftë të gjykojnë një çështje të tillë, pasi kjo është një çështje që duhet të studiohet nga historianët dhe akademikët e fushës./AO/