Ekonomi

Dyfishohet importi i Maqedonisë nga Kosova

Sivjet edhe importi i mallrave të Kosovës në Maqedoni ka shënuar rritje në krahasim me eksportet që kanë mbërritur shifra rekorde.

E premte 16 Dhjetor 2011 19:07

Sipas Entit Shtetëror të Statistikave në Shkup, importi i mallrave nga Kosova për në tregun e Maqedonisë gjatë këtij viti është dyfishuar në krahasim me vitin 2010, raporton INA. Derisa një vit më parë vlera e importeve ka qenë 17 milion dollarë për periudhën janar - tetor, këtë vit shifra ka mbërritur në 30 milionë dollarë deri në muajin tetor.

Tërë këto trende kanë lëvizur pozitivisht që nga vendosja e barrierave për mallrat serbe nga ana e palës kosovare dhe pasi që Maqedonia u shndërrua si një nga vendet me eksport më të lartë për në Kosovë, duke u renditur me disa vende tjera. Trendi i eksportit ka shifra rekorde duke shkuar në 453 milionë dollarë për vitin 2011, apo rreth 92 milionë dollarë më tepër në krahasim me vitin 2010.

Ministritë e Ekonomisë të Maqedonisë dhe Kosovës kanë paralajmëruar rritjen e vazhdueshme të këtyre trendeve, duke krijuar një bum të vërtetë të bashkëpunimit dhe shkëmbimit tregtar, përmes lehtësimit tatimor dhe doganor./ekonomisti/