Rajon dhe Botë

Egjipt: ElBaradie fton për unitet në rrugën e demokracisë

E mërkure 8 Shkurt 2012 11:37

Politikani egjiptas, Mohamed ElBaradei, u ka bërë thirrje bashkëkombasve të vet, për t’i kapërcyer dallimet dhe për unitet, në mënyrë që vendi të vendoset në rrugën e demokracisë dhe t’i shmanget sundimit ushtarak.

Në një artikull në të përditshmen londineze, Financial Times, z.ElBaradei, ish shef i Agjencisë Ndërkombëtare për Energji Bërthamore, i ka dhënë mbështetje Vëllazërisë Myslimane, një grup islamist i organizuar mirë, për të cilin ai beson se “do t’i përqafoj grupet e tjera politike, do ta mbështesë tregun e lirë dhe do të jetë pragmatik”.

ElBaradei, që në vitin 2005, e kishte fituar Çmimin Nobel për Paqe, aktivitetin e sundimit ushtarak në Egjipt, e ka përshkruar si “nën pritjet”, duke thënë se egjiptianët kanë parë “pak ndryshime pozitive”, derisa ekonomia e këtij vendi, përfshirë edhe industrinë turistike tejet të zhvilluar, po shënon rënie.