Kulturë

Ekspozita “Arti islam” në Podujevë

E mërkure 20 Janar 2010 9:02

 

Nga: Blerim HALILI

Nën organizimin e Asociacionit për Kulturë, Edukim dhe Arsim (AKEA) dhe Shoqatës së Artistëve Figurativë të Kosovës (ShAFK) dhe në prani të një numri të konsiderueshëm mysafirësh, artistë, profesorë, përfaqësues nga jeta institucionale, kulturore dhe fetare, studentë dhe nxënës, të hënën (18.01.2010) në Podujevë në Restaurant "Beni Dona", u hap ekspozita artistike “Arti Islam 4”.

Në këtë ekspozitë u prezantuan 39 punime të artistëve kosovarë, që ngërthejnë tematika nga vlerave estetike dhe etike të Islamit.

 

 

Në fjalën përshëndetëse në emër të Asociacionit për Kulturë, Edukim dhe Arsim (AKEA), z. Bashkim Mehani bëri një përshkrim të idesë dhe iniciativës për organizimin e kësaj ekspozite që nga fillet e saj dhe po ashtu theksoi disa veçanti të kësaj ekspozite përkatësisht të këtij arti. Ai gjithashtu potencoi interesimin e artistëve në këtë edicion, i katërti me radhë krahasuar me edicionet paraprake, si dhe objektivat që për vitet e ardhshme synohet përfshirja në të edhe e artistëve më eminent të vendit.

Me këtë rast, ekspozitën e përshëndeti edhe Drejtori i Drejtorisë për Kulturë, Rini dhe Sport pranë Kuvendit Komunal të Podujevës, z. Nexhmi Balaj, i cili përgëzoi këtë organizim duke çmuar punën e AKEA-së dhe rëndësinë e ekspozitës me punimet e saj dhe veçanërisht për faktin se ajo në Podujevë organizohet për herë të parë.

Në përcjellje të instrumentaleve nga muzika e mistikës islame vizitorët patën rastin të komunikojnë me botën e artit, duke provuar të nxjerrin domethëniet e ilustrimeve, dekorimeve të shkrira në punime.

Ekspozitën “Arti Islam 4” ndonëse Asociacioni për Kulturë, Edukim dhe Arsim (AKEA) kësaj radhe, pasi e realizoi atë në kryeqytet me një interesim dhe vëmendje të madhe nga vizitorët, si dhe pas prezantimit të saj në qytetin e kulturës dhe historisë shqiptare, në Prizren, e pa të arsyeshme që qasjen në të t’ua mundësojë edhe artdashësve llapjanë, trevë kjo e dalluar për ruajtjen e autoktones dhe vlerave të saj.