Kupa Botërore 2010

Fillojnë bisedimet, Shaqiri-Hamburg

E enjte 1 Korrik 2010 10:44

 

Interesimi i Hamburgut për talentin shqiptar Xherdan Shaqiri ka filluar të intensifikohet. Klubi gjerman e ka filluar ofanzivën, për ta bërë të vetin futbollistin 18 vjeç, që aktualisht luan tek FC Basel.

Sipas tabloidit gjerman, Bild, drejtori sportiv i Hamburg, Bastian Reinhardt, ditëve të fundit ka pasur një takim të fshehtë në Hamburg me përfaqësuesit e Shaqirit, përkatësisht menaxherin, Wolfgang Voge, me të cilin ka biseduar rreth mundësisë së transferimit në Bundesligan gjermane të talentit nga Gjilani.

Pasi e kishte marrë pozitën e drejtorit tek Hamburg, Reinhardt nuk e kishte fshehur simpatinë e tij për përfaqësuesin zviceran, i cili me përfaqësuesen zvicerane debutoi në Kampionat Botëror, përkundër moshës mjaft të re.

Mirëpo, problemi i vetëm është se Shaqiri ka kontratë me Baselin deri në vitin 2014. Për këtë, kampioni i ri zvieran nuk e ka ndërmend të heq dorë nga ylli i vet i ri për një shumë më të vogël sesa 8 milionë euro.

Mbetet të shihet në ditët në vazhdim se sa serioz është interesimi i klubit gjerman. Shaqiri shpërtheu këtë vit me Baselin, tek i cili kontribuoi në fitimin e titullit të kampionit dhe Kupës së Zvicrës.

Gjithnjë sipas Bild, edhe vet Shaqiri e ka shprehur dëshirën e tij për të luajtur tek Hamburg, të cilin e konsideron si klub të madh dhe mundësi të mirë për t’u ngritur si futbollist. Sezonin e fundit, Shaqiri pati 32 paraqitje në elitën e futbollit zviceran, duke realizuar 4 gola për Basel./express/