Kulturë

Fjalori arabisht-shqip, një vepër ambicioze

E enjte 13 Tetor 2011 20:53

Studiues të gjuhësisë dhe njohës të kulturës arabe, të martën paradite, janë bërë bashkë në amfiteatrin e Bibliotekës Kombëtare Universitare të Kosovës në promovimin e Fjalorit arabisht-shqip të profesor Isa Memishit. Në dy vëllime me dy mijë faqe Memishi ka përthekuar 100 mijë fjalë. Krejt kjo punë kishte nisur kur vetë ai, në kohë studimesh, qe përballur me telashe të shumta në mungesë të një fjalori të tillë.

Ishte dashur më shumë se një dekadë që ai të përfundojë misionin që ia kishte vënë vetes.

“Duke marrë parasysh literaturën klasike shumë të pasur, krahas leksikut bashkëkohor të gjuhës arabe, më është dashur që në këtë projekt të përfshijë edhe e mjaft shprehje të vjetra”, ka thënë Memishi. E autori është shprehur modest dhe i hapur për kritika.

“Jam i vetëdijshëm se, me gjithë vëllimin e këtij fjalori, mund të më kenë shpëtuar fjalë të mos kem përfshirë në këtë botim. Më mban shpresa se në rast të ribotimit do të përpiqem ta pasuroj edhe më”, ka thënë ndër të tjera ai.

Organizator i këtij promovimi ka qenë Bashkësia Islame e Kosovës në bibliotekën e së cilës do të zërë vend ky libër. Myftiu i Kosovës, Naim Tërnava, ka thënë se “botimi i këtij fjalori përpos që pasuron fushën e leksikografisë në gjuhën shqipe me fjalorë dygjuhësorë, do të krijojë rrethana dhe kushte të reja për studiuesit, shkencëtarët e publicistët.

Për Bardh Rugovën, shef i Departamentit të Gjuhës Shqipe në Fakultetin e Filologjisë, fjalori është një ndërtim i fuqishëm që tregon seriozitet të autorit.

“Është një vepër ambicioze, e guximshme dhe e dobishme”, ka thënë Rugova. “Fjalori arabisht – shqip i profesor Memishit përmbush një mungesë të botimeve të këtilla në gjuhën shqipe”.

Për Feti Mehdiun fjalori është vepër madhore për kulturën shqiptare.

“Ky promovim është një moment i veçantë dhe është ngjarje e rrallë për historinë e kulturës shqiptare, në përgjithësi dhe për leksikografinë e orientalistikën shqiptare në veçanti”, ka thënë Mehdiu. Sipas tij, fjalori është një urë që lidh dy popuj.

“Një fjalor sikur ky ka qenë i shumëpritur për opinionin shqiptar, për studiuesit, për publicistët, shkencëtarët, madje edhe për njerëzit kureshtarë që dëshirojnë të pasurojnë kulturën personale dhe të hapin horizonte të reja të dijes”, ka thënë Mehdiu./koha/