Sport

Fundi i pritjes

Michael Essien është optimist se Chelsea do të përfundojë pritjen e gjatë për Ligën e Kampionëve këtë sezon.

E shtune 4 Shtator 2010 17:01

Gjiganti londinez konsiderohej kandidat serioz në Evropë prej kur Roman Abramovich mori drejtimin e klubit më 2003. Ata arritën në gjysmëfinale të garës më 2004, 2005, 2007 dhe 2009 si dhe u mposhtën në penallti në finalen e edicionit 2008.

Chelsea ka fituar tre tituj në Premierligë, tre FA Cup-a dhe dy Kupa të Ligës prej kur Abramovich erdhi në Stamford Bridge, ndërsa tani skuadra është e vendosur të triumfojë në Evropë.

“Kemi vendosur objektiva të larta dhe synimi ynë është të fitojmë çdo garë në të cilën marrim pjesë. Tani do të luftojmë për katër tituj dhe të gjithë jemi të gatshëm të japim maksimumin. Jam shumë i lumtur që edicionin e kaluar fituam Premierligën dhe FA Cup, por jam i sigurt se këtë vit mund të shtojmë të madhën, Ligën e Kampionëve”, tha Essien për sportinglife.com.

“Të gjithë e dinë se çfarë rëndësie ka kjo garë për ne. Si ekip që ka fituar çdo titull shtetëror është e natyrshme që jemi të uritur për sukses në Evropë. Nuk dua të them se nuk na intereson Premierliga, FA Cup ose Carling Cup, sepse duam të fitojmë çdo garë në të cilën marrim pjesë. Të gjitha”, përfundoi ai./express/