Rajon dhe Botë

Hakerët kinezë sulmojnë NATO-n, institucionet e BE-së dhe SHBA-së

E hëne 8 Mars 2010 22:51

BE-ja, SHBA dhe NATO gjithnjë e më shumë janë të ekspozuara ndaj sulmeve kompjuterike nga Kina, ndërsa Perëndimi nuk është ende në gjendje të mbrohet në mënyrë efikase nga sulmet e hakerëve kundër hyrjeve në sistemet kompjuterike të institucioneve dhe shërbimeve të inteligjencës, njoftuan mediet perëndimore.

NATO dhe BE-ja kanë paralajmëruar gjatë ditëve të kaluara se duhet mbrojtur urgjentisht materiali i shërbimeve sekrete nga sulmet më të reja të hakerëve nga Kina, ndërsa Pekini demanton përfshirjen në sulmet e hakerëve, shkruan sot “Times”.

Sulmeve i janë ekspozuar institucionet qeveritare dhe ushtarake në SHBA, ndërsa analistët e atjeshëm thonë se Perëndimi nuk ka mënyrë efikase t’i kundërpërgjigjet këtyre sulmeve, thotë e përditshmja londineze.

BE-ja është më e rrezikuara, pasi që mbrojtja nga sulmet kompjuterike i është besuar shteteve anëtare.

Jonathan Evans, drejtori i përgjithshëm i shërbimit britanik të kundërzbulimit MI5 ka paralajmëruar që në vitin 2005 se disa shtete po merren aktivisht me sulme kompjuterike. Ai atëherë nuk kishte precizuar se për cilin shtet është fjala, por pjesëtarët e shërbimeve të sigurisë tani thonë se rreziku më i madh në këtë aspekt vjen nga Kina.

Drejtori i FBI Robert Miller ka paralajmëruar që përveç shteteve të huaja, në të ardhmen rrezik mund të paraqet edhe al-Qaeda. /koha/