Kulturë

Institucionet arsimore organizuan "Javën e Librit"

E hëne 26 Prill 2010 16:02

 

TIRANË - Në kuadrin e “Ditës Botërore të Librit”, Instituti i Sociologjisë, në bashkëpunim me Universitetin e Europës Juglindore të Tetovës, Universitetin “Marin Barleti” dhe Shtëpinë Botuese “Dudaj” nga data 19-24 prill 2010, organizuan “Javën e librit”.

 

Në ambientet e Universitetit "Marin Barleti" qëndroi për disa ditë i hapur "Salloni i Librit" ku të gjithë autorët, botuesit dhe miqtë e librit ishin të ftuar të sjellin dhe promovojnë librat e tyre, apo libra që i konsiderojnë të rëndësishëm.

Biseda me studentët dhe të interesuarit e tjerë, shkëmbime librash si dhe debate mbi rëndësinë e librit sot dhe të ardhmen e tij ishin tema të bisedave që organizoheshin në këtë sallon gjatë kësaj jave.

"Java e Librit" e organizuar nga Instituti i Socilogjisë dhe Universiteti "Marin Barleti" u mbyll me aktivitetin e ditës së Shtunë, (dt. 24 prill 2010 ora 10:00 - 13:00) kur u prezantua seria e librave të prof. Servet Pëllumbi, drejtor akademik i Institutit të Sociologjisë (10 libra të periudhës 2000-2010). Tjetër ngjarje e rëndësishme e së shtunës ishte prezantimi i veprës "Fjalori i Sociologjisë", i dr. Ali Pajazitit, UEJL të Tetovës, e para vepër e këtij lloji dhe përmase në gjuhën shqipe.