Kulturë

Investimet në Kalanë e Novobërdës

E marte 2 Mars 2010 13:46

 

Në qendrën trajnuese, pranë selisë së Komunës së Novobërdës, u mbajt takimi: “Vlerat kulturo-historike të Novobërdës –modelet e afirmimit të saj”. Në këtë takim mori pjesë edhe Ministri i Kulturës, Rinisë dhe Sportit, Valton Beqiri, si dhe Kryetari i Kuvendit të Komunës së Novobërdës, Bajrush Ymeri. Me këtë rast, Ministri Valton Beqiri duke përkrahur këtë nismë për afirmimin e vlerave të trashëgimisë kulturore theksoi se, ruajtja dhe promovimi i trashëgimisë kulturo – historike janë prioritet i MKRS- së duke përfshirë këtu edhe komunën e Novobërdës. Ai, gjithashtu, theksoi se MKRS në vitin 2009 ka ndarë 40.000 Euro për hartimin e projektit të studimit për Novobërdës, ndërkaq, për vitin 2010 për implementimin e këtij projekti MKRS ka ndarë shumën prej 100.000 Euro. Edhe përkundër buxhetit të limituar, shtoi ai, edhe në të ardhmen, MKRS do të angazhohet për realizmin e projekteve që begatojnë promovimin dhe ruajtjen e vlerave të trashëgimisë kulturore.Në këtë takim, në të cilin morën pjesë edhe përfaqësuesit e institucioneve kulturore në varësi të MKRS-së, organizatave joqeveritare vendore dhe ndërkombëtare, Kryetari i Komunës së Novobërdës,Bajrush Ymeri, theksoi se, Kalaja e Novobërdës me objektet e saj përcjellëse është një monument i rëndësisë së veçantë, jo vetëm për këtë komunë por edhe për vendin tonë.Më tutje, ai theksoi se, aktualisht, Kuvendi Komunal i Novobërdës po angazhohet për zhvillimin e turizmit rural, i cili, që nga viti paraprak me ngritjen e Qendrës Turistike që ka investuar CARE International, tashmë kemi filluar t’i korrim rezultatet e para.Ndërkaq, përfaqësuesi i ICO-së, Alessandro Leone, tha se ICO do të mbështesë angazhimet për ruajtjen e vlerave të trashëgimisë kulturore por edhe zhvillimin e turizmit kulturor, që tashmë ka dhënë rezultate konkrete. /bota sot/