Kosovë

KFOR-i shqyrton ngrirjen e marrëdhënieve me FSK-në

E shtune 6 Mars 2010 20:03

 

Parakalimi i Forcave të Sigurisë së Kosovës me armë, në ditën e parë të manifestimit “Epopeja e UÇK-së”, ka shkaktuar pakënaqësi të madhe tek kreu i forcave paqeruajtëse të KFOR-it, i cili gjatë ditës së premte madje ka shqyrtuar edhe mundësinë e “ngrirjes së marrëdhënieve” me FSK-në, ka marrë vesh “Koha Ditore” nga burime të sigurta.

Këtë e ka konfirmuar në orët e vona të pasdites shefi i Zyrës për media i KFOR-it, koloneli Hans Peter Buh. Ai ka thënë se KFOR-i ka kërkuar që gjatë manifestimit pjesëtarët e FSK-së të mos paraqiten me armë, mirëpo një gjë e tillë, sipas tij, është shpërfillur.

“FSK-ja nuk ka pasur leje të bartë armë sot”, ka thënë Buh. Ai ka bërë të ditur se me gjithë diskutimet e zhvilluara gjatë ditës KFOR-i ende nuk ka marrë vendim për masat, duke mos e përjashtuar mundësinë e shkëputjes së marrëdhënieve me FSK-në.

“Jemi duke e diskutuar edhe këtë, por do të shohim se cili do të jetë vendimi përfundimtar”, ka thënë Buh.

Ndërkohë një deklaratë të tillë nuk ka mundur ta besonte Zyra e Kryeministrit të Kosovës, Hashim Thaçi, nën patronazhin e të cilit edhe është bërë organizimi i të gjithë manifestimit për “Epopenë e Ushtrisë Çlirimtare të Kosovës”. Këshilltari i kryeministrit, Shaip Muja, ka thënë se kjo informatë më shumë është pjesë e “bulevardeve të gazetarëve”, sesa diçka zyrtare.

“Nuk e besoj se për një çështje të tillë mund të ngrihen marrëdhëniet, s’e kemi rëndu askënd dhe nuk besoj se kjo informatë është përcjellë nga NATO-ja”, ka deklaruar Muja për gazetën nëpërmjet telefonit. Ai ka shtuar se armët janë pjesë e Gardës ceremoniale.

“Nuk është ajo bartje e armëve, por është pjesë përbërëse e Gardës që i jep kuptim asaj. Nuk e di se si e ka komentuar KFOR-i këtë, ne s’kemi diçka zyrtarisht ende dhe nuk besoj që NATO-ja i prish raportet për një çështje aq minore dhe për një çështje kaq domethënëse”, ka thënë këshilltari Muja.

Sipas Mujës, Qeveria e Kosovës, përkatësisht Këshilli organizativ i Epopesë, nuk ka marrë kurrfarë paralajmërimi për bartjen apo jo të armëve nga pjesëtarë të FSK-së. “Kjo është gardë për respektimin e delegacioneve që vijnë në Kosovë ose për ceremoni mortore. Ne jemi duke bërë shtet dhe nëse dikujt i pengon që ceremonia të mos përcillet me këtë simbolikë, mendoj që nuk është e nevojshme të komentohet”, ka thënë Muja, duke theksuar vazhdimisht se nuk është në dijeni për ndonjë reagim të KFOR-it.

Ndërkohë, as Ministria e Forcës së Sigurisë e Kosovës gjatë ditës së premte nuk ka pasur ndonjë informacion për “hidhërimin” e KFOR-it.

“Ne nuk kemi marrë diçka konkrete për atë që po thoni, s’kemi ndonjë reagim konkret dhe nuk e dimë nga ka ardhur ky reagim. FSK-ja ka qenë e pranishme me agjendë të Qeverisë dhe i është përmbajtur agjendës së Këshillit organizativ që ka qenë nën patronazhin e kryeministrit Hashim Thaçi”, ka deklaruar zëdhënësi i Ministrisë së FSK-së, Ibrahim Shala. /koha ditore/

 

Karikaturë e Jeton Mikullovcit /Koha Ditore/