Sport

Kikboks:Bajrami mbron titullin kundër britanikut Knowles

E mërkure 24 Shkurt 2010 10:23

Meçi do të zhvillohet më 8 maj në palestrën "1 Tetori", në Prishtinë. Mbrëmja e kikboksit do të quhet "K-1 Nata e Gladiatorëve" dhe pos meçit kryesor Bajrami - Knowles, do të zhvillohen edhe pesë meçe të tjera profesioniste. Në këto meçe do të paraqiten kikboksierët kosovarë: Tefik Bajrami, Avni Kabashi, Blerim Rashiti, Muharrem Hasani e Shemsi Beqiri.

"Sërish në Prishtinë do të kemi një mbrëmje të madhe kikboksi dhe të vlefshme për titullin e kampionit të botës në kategorinë e rëndë", ka thënë Exenberger. "Kësaj here Bajrami do të mbrojë titullin e botës kundër britanikut Knowles që është numër një në Britani. Pres një meç të fortë dhe shpresoj që Bajrami edhe njëherë të dëshmohet para publikut kosovar".

Bajrami është në Kosovë, por thotë se gjatë javës do të udhëtojë në Zvicër për të nisur përgatitjet për këtë meç.

"Do të jetë një ngjarje e madhe jo vetëm për mua, por për mbarë Kosovën. Nuk premtoj shumë, por pres një meç të fortë dhe jam i gatshëm të jap maksimumin për ta mbrojtur titullin e kampionit", ka thënë Bajrami. "Kundërshtari është i qëndrueshëm dhe i lëvizshëm, por besoj se përvoja ime do të jetë përparësi e madhe. Pres që tifozët edhe njëherë t'i gëzohen suksesit tim"./koha/