Kosovë

Kosova do të dalë fitimtare

Thaçi tha sot se Prishtina zyrtare është e përgatitur për t’u përballur me Beogradin në Asamblenë e Përgjithshme të OKB-së.

E mërkure 1 Shtator 2010 16:50

Kryeministri Hashim Thaçi tha sot se Prishtina zyrtare është e përgatitur për t’u përballur me Beogradin në Asamblenë e Përgjithshme të OKB-së, ku Serbia ka proceduar një projektrezolutë, me anë të së cilës kërkon negociata të reja për statusin e Kosovës.

Thaçi tha se ai vet, presidenti Fatmir Sejdiu dhe ministri i Punëve të Jashtme do të jenë në New York gjatë punimeve të sesionit të radhës së Asamblesë së Përgjithshme të OKB-së.

“Jam më se i bindur se do të dalim fitimtarë edhe në Asamblenë e Përgjithshme të OKB-së ashtu sikurse kemi dalë fitimtarë në Gjykatën Ndërkombëtare të Drejtësisë, e cila muajin e kaluar e bëri të qartë se Deklarata e Pavarësisë së Kosovës nuk bie ndesh me të drejtën ndërkombëtare”.

Kryeministri i bëri këto komente gjatë mbledhjes së qeverisë së Kosovës, një ditë pasi Serbia, pas presioneve të Bashkimit Evropian, pranoi të ndryshojë rezolutën, por jo edhe ta tërheqë atë nga shqyrtimi në Asamblenë e Përgjithshme të OKB-së, më 9 shtator. /Telegrafi/