Kuzhinë

Kuzhinierët turq rekord me omletën më të madhe në botë

E shtune 9 Tetor 2010 20:24

Kuzhinierët turq vendosën një rekord të ri botëror me realizimin e omëletës më të madhe në botë të premten e kaluar gjatë Ditës Botërore të Vezës në kryeqytetin e vendit, Ankara. Tetëdhjetë kuzhinierë u mblodhën rreth një tigani me diametër 10 metra duke nisur të përgatisnin omëletën më të madhe në botë. "Rreth 110.000 vezë u thyen dhe u rrahën njëherazi duke shmangur kështu sjelljen këtu dhe thyerjen e tyre njëra pas tjetrës. Kështu fituam kohë dhe shmangëm ndotjen. Objektivi ishte realizimi i një omëlete me peshë 6 ton" kreu i shoqatës së prodhuesve të vezëve në Turqi, Deria Pala.

Rekordi i mëparshëm përsa i përket omëletës më të madhe në botë mbahej nga Afrika e Jugut ku në vitin 2009 u përgatit një omëletë me peshë 3.2 ton. Por thyerja e këtij rekordi nuk qe aspak e lehtë. " Ne synojmë të përgatisim një omëletë me peshë 6 ton por po hasim vështirësi pasi ekziston rreziku i djegies para se ta heqim në kohë nga tigani" tha një prej kuzhinierëve.

Rekordi botëror u thye më në fund kur u arrit të përgatitej omëleta me peshë gjashtë ton. Për përgatitjen e saj u deshën 2 orë e 30 minuta. "Rekordi i mëparshëm i vendosur nga Afrika e Jugut u thye nga Turqia ndaj ky vend është rekordmeni i ri" tha përfaqësuesi i Librit të Rekordeve Gines, Carim Valerio.

Banorët e Ankarasë thanë se omëleta gjigande ishte tepër e shijshme. "Ka shije të mirë, shumë të mirë madje. Unë ha një vezë në ditë ndaj më pëlqeu pa masë kjo omëletë" tha banori i Ankarasë, Semih Juksel. "Pjesa më e mirë është fakti që e përgatiti im shoq" tha një tjetër banore, bashkëshorti i së cilës ishte mes kuzhinierëve që vendosën një rekord të ri botëror.