Maqedoni

Liderët e partive më relevante në Maqedoni takohen në Shkup

E premte 12 Mars 2010 9:12

 

Dje në Shkup u realizua takimi i liderëve të partive me relevante në Maqedoni.

Tema e takimit ishte iniciativa e VMRO-DPMNE-së për ndryshimet kushtetuese që kanë të bëjnë me punën e Këshillit Gjyqësor Republikan. Iniciativa për ndryshimet kushtetuese, siç ka thënë Nikolla Gruevski ka të bëjë me përforcimin e pavarësisë në sistemin gjyqësor dhe rritja e efikasitetit te tij.

Ndryshimet në kushtetutë parashikojnë rritjen e numrit të anëtarëve të Këshillit gjyqësor republikan, heqjen e të drejtës Ministrit të Drejtësisë që të jetë anëtarë i Këshillit Gjyqësor Republikan si dhe shkurtimin e mandatit nga 6 në 4 vjet. Këto ndryshime, sipas Kryeministrit Gruevski, shmangin presionet e ndryshme ndaj gjyqësorit.

Ali Ahmeti dhe Imer Selmani në parim pajtohen me iniciativën e cila synon reformimin e sistemit të jurisprudencës, por kanë dhënë edhe vlerësimet e tyre lidhur me këto ndryshime në kushtetute. Imer Selmani ka propozuar që edhe në Këshillin Gjyqësor, vendimet të merren duke u bazuar në parimin e badinterit.

Çdo iniciativë që shkon në kahje të depolitizimit të gjyqësorit për DR-në është pozitive dhe pas shqyrtimit të propozimit të Qeverisë do të prononcohet me qëndrim konkret ditëve të ardhshme ka thënë lideri i saj Imer Selmani.

Lideri i LSDM-se Branko Cërvenkoski i ka vlerësuar si tejet serioze ndryshimet e paralajmëruara kushtetuese, por, siç theksoi, ka kërkuar dokument me shkrim për atë që është prezantuar nga ana e Kryeministrit. Ai tha se pasi të analizohet mirë përmbajtja e propozim ndryshimeve do të vendosin nëse do ti përkrahin apo jo propozimet e paraqitura. Në takim nuk u arrit ndonjë marrëveshje konkrete. Liderët sërish do të takohen që ta shqyrtojnë iniciativën për ndryshim të kushtetutës.

Në takimin e realizuar dje të pranishëm ishin lideri i VMRO-DPMNE-së Nikolla Gruevski, lideri i Bashkimit demokratik për Integrim Ali Ahmeti, ai i Lidhjes Socialdemokrate, Branko Cervenkovski dhe Kryetari i Demokracisë së re Imer Selmani. Ndërkohë që lideri i Partisë Demokratike Shqiptare Menduh Thaci nuk ish i pranishëm në takim./trt/