Maqedoni

Maqedonia, Bulgaria nënshkruajnë memorandum ndër-kufitar

E marte 31 Gusht 2010 11:06

Maqedonia dhe Bulgaria do të nënshkruajnë sot një memorandum të mirëkuptimit për bashkëpunim ndër-kufitar, pjesë e projekteve të përcaktuara dhe financuara nga Bashkimi Evropian.

Marrëveshja do të nënshkruhet sot në kryeqytetin bullgar, midis Ministrit të Maqedonisë për qeverisje lokale, Musa Xhaferi, dhe Ministrit të Bullgarisë për Zhvillim Rajonal Soren Plevneliev.

Sipas këtij memorandumi parashihet që të dy vendet përmes këtij projekti të shtojnë bashkëpunimin në fushën e zhvillimit ekonomik, kohezionit social dhe përmirësimin e jetës së qytetarëve, thuhet në një komunikatë të qeverisë.

Programi i bashkëpunimit në fjalë, është pjesë e projekteve të Komisionit Evropian për bashkëpunim fqinjësor midis shteteve. Projekti në fjalë financohet nga ky trup ekzekutivi i BE-së, në kuadër të Instrumenteve të Para-Anëtarësimit (IPA)./Zhurnal/