Bota Jonë

Mashtrim - AH1N1 nuk është virus i ri

E diel 31 Janar 2010 23:07

“Kur është shpallur pandemia e gripit AH1N1, në tryezën e Organizatës Botërore të Shëndetësisë (OBSH) ishin të ulur edhe përfaqësuesit e kompanive farmaceutike. Duhet të pyesim veten se a ka pasur aty ndikim të parregullt në OBSH-në për të shpallur pandemi gripi, për të cilin që atëherë dihej se me karakteristikat e tij ai është më i dobët dhe më pak i rrezikshëm sesa gripi sezonal”, tha në një intervistë për Blic dr. Wolfgang Wodarg, kryetar në largim i Komitetit për shëndetësi i Asamblesë parlamentare të Këshillit të Evropës, me nismën e të cilit është iniciuar hetimi i përgjegjësisë së OBSH-së në lidhje me përhapjen e panikut, nga i cili kanë përfituar ekskluzivisht farmacistët.

“Në momentin kur numri i të prekurve në rajonin rreth kryeqytetit Meksiko Siti, ku jetojnë 20 milionë banorë, kishte hipur në 1 000, OBSH filloi të fliste për pandemi, gjë që ishte e pakuptimtë. Si drejtor i një institucioni publik shëndetësor në Gjermani i kam përcjell sezonet e gripit çdo vit dhe e di se rreth 10 për qind e popullatës sëmuret gjatë një sezoni dhe se regjistrohen rreth 10 raste të vdekjeve në 100 000 njerëz, gjë që konsiderohet normale çdo vit. Ndërkaq, informatat që i merrnim nga Meksikoja flisnin për numra më të vegjël, shumë më të vegjël. Atëherë filluan ta arsyetojnë pandeminë me gjoja virus të ri të gripit. Edhe kjo ishte e pavërtetë, sepse atëherë u dëshmua se njerëzit me moshë mbi 60 vjeçe nuk sëmureshin, përkatësisht përqindja e tyre ishte shpërfillëse. Kjo donte të thoshte se ata kanë pasur tashmë sistem të zhvilluar të imunitetit, ose nëpërmjet vaksinimit në të kaluarën ose nëpërmjet infektimit, dhe se bëhej fjalë për një virus ndaj të cilit ata ishin imunë. Pra, ku nuk ishte virus i ri për sistemin e imunitetit të njerëzve, gjë që ka mundur të parashihet në maj të vitit 2009, para se të shpallej pandemia nga ana e OBSH-së.

Ai me këtë rast ka përmendur edhe rastin e Polonisë, ku nuk ka pasur vaksinim kundër gripit të derrit, e megjithëkëtë numri i të infektuarve nuk ka qenë më i madh se në vednet e tjera ku njerëzit janë vaksinuar.
Në fund, Woldarg tha se sipas vlerësimeve të komitetit për shëndetësi, vetëm në Evropë për vaksina janë shpenzuar prej tre deri në pesë miliardë euro, ndërsa në botë vlerësohet të jenë shpenzuar afër 18 miliardë dollarë. Kjo është një punë shumë e madhe. Në OBSH rrinë ulur funksionarë të industrisë farmaceutike, por me OBSH-në bashkëpunojnë edhe shumë mjekë e ekspertë, të cilët janë të përfshirë në hulumtime klinike për firmat farmaceutike dhe madje gjenden në listat e tyre të rrogave. /koha/