Maqedoni

Mbi 3 mijë turistë për skijim në Kodrën e Diellit

E hëne 20 Shkurt 2012 8:57

Në Kodrën e Diellit në Malësinë e Sharrit gjatë fundjavës ka pasur mijëra turistë.

Nga Shoqëria për hotelieri dhe turizëm “Kodra e Diellit” bëjnë të ditur për INA se gjatë fundjavës pushues nga vendi dhe nga jashtë, kryesisht vendet fqinje kanë shfrytëzuar borën dhe kohën e qetë me diellë.

Sipas vlerësimeve të tyre, bëhet fjalë për mbi 3 mijë turistë që kanë qëndruar dy ditët e fundit në Kodrën e Diellit. Në numër të madh kanë qenë turistët nga Shqipëria dhe Kosova, të cilët tradicionalisht vizitojnë këtë atraksion turistik.

“Të gjitha kapacitetet e dy hoteleve tona janë të angazhuar. Kemi mysafirë nga Shqipëria dhe Kosova, si dhe Serbia. Të gjitha rezervimet janë për dy ditë”, theksuan nga Shoqëria për hotelieri dhe turizëm “Kodra e Diellit”.

Gjatë kësaj jave paralajmërohet mbërritja e turistëve nga Holanda, Franca, Belgjika dhe nga Izraeli. Trashësia e borës në Kodrën e Diellit ka mbërritur mbi 1 metër. (INA)