Kulturë

Mësuesi Kosovës, revistë që i dedikohet mësimdhënësve

E diel 11 Dhjetor 2011 13:00

Zyrtarë të Ministrisë së Arsimit bëjnë të ditur se kjo revistë ka karakter informues, ku do të përfshijë rubrika të ndryshme, që nga aktivitetet e ministrisë e deri te krijimtaritë e mësimdhënësve.

Me vendim të Ministrit të Arsimit, Ramë Buja, revista “Mësuesi i Kosovës”, do të fillojë të dalë nga ky muaj si organ zyrtar i ministrisë.

Këshilltari Ragip Gjoshi, tha për Radio Kosovën se kjo do të jetë revistë që fillimisht do të përmbajë tre faqe aktivitete mujore të ministrit dhe ministrisë.

“Përveç revistë informative do të jetë edhe pedagogjike profesionale. Pastaj do të jetë arsimi nëpër komuna. Do të ketë edhe kronika nga historiku i zhvillimit të arsimit në Kosovë, do t’i kushtohet vëmendje të madhe edhe arsimit nëpër komuna. Vëmendje të veçantë do të ketë edhe për arsimin e lartë dhe shkencën, rubrika të cilat do të jenë të përhershme”, theksoi ai.

Këshilltari Gjoshi, tha se revista do të ketë bashkëpunëtorë të gjithë mësimdhënësit dhe njerëzit e lidhur me arsimin.

Ai theksoi se qëllimi kryesor është informimi, duke publikuar të gjitha aktivitetet e ministrisë, vendimeve, ligjeve e të tjera.

Sipas Gjoshit, kjo nuk është revistë që do të ekspozojë vetëm rezultatet e ministrisë, por e plotëson vakumin e gazetave, të cilat siç tha, vrapojnë pas ndonjë defekti apo lajmi të keq.

“Ta zëmë 23 mijë e 300 mësimdhënës që një jetë të tërë ia kushtojnë arsimit dhe kurrë nuk e shohin veten në faqet e një gazete, është kjo mundësi që këtu të prezantohet së paku, sepse gazetat tona të përditshme vrapojnë fatkeqësisht vetëm pas ndonjë defekti dhe pas ndonjë pune të pakryer”, tha ai.

Në këtë revistë do të ketë vend edhe për mësimdhënësit krijues.

Do të ketë edhe tematika të ndryshme nga të gjitha njësitë bartëse të ministrisë, institute, qendra e studentëve etj.

Revista “Mësuesi i Kosovës” do të shpërndahet falas. Botimin e mundëson ministria e arsimit nga buxheti i saj./rtk/