Maqedoni

Milloshoski-Meta: Marrëdhëniet mes Maqedonisë dhe Shqipërisë të mira

E hëne 8 Shkurt 2010 15:22

 

Marrëdhëniet mes Maqedonisë dhe Shqipërisë janë të mira, por nevojitet të punohet në thellimin e sferës ekonomike, vlerësuan sot në konferencën për shtyp në Tiranë ministrat e punëve të jashtme Antonio Milloshoski dhe Ilir Meta. Si tejet të rëndësishme ata i vlerësuan projektin e Korridorit 8, përforcimin e marrëdhënieve dypalëshe dhe tregtare, bashkëpunimin dhe këmbimin e përvojave lidhur me proceset integruese. "Do të vazhdojmë ta ndërtojmë Maqedoninë si model të shoqërisë shumetnike dhe demokratike. Në regjistrimin e vitit të ardhshëm qytetarët e Shqipërisë do të mund ta shprehin përkatësinë e tyre kombëtare dhe fetare. Kjo do të jetë mundësi e mirë për maqedonasit të cilët jetojnë në Shqipëri si qytetarë të besueshëm ta shprehin përkatësinë e tyre kombëtare dhe të bëhen pjesë më e integruar e shoqërisë shqiptare", deklaroi Milloshoski. Paraprakisht, dy ministrat nënshkruan protokolle për bashkëpunim mes dy ministrive dhe midis Drejtorisë për edukim diplomatik në kuadër të Ministrisë së Jashtme të Maqedonisë dhe Akademisë Diplomatike në kuadër të Ministrisë së Jashtme të Republikës së Shqipërisë. /mia/