Rajon dhe Botë

Netanyahu kërkon mbështetjen e Rusisë për Iranin

E hëne 8 Shkurt 2010 23:13

Vizita e tij tre-ditore, e planifikuar javë më parë, ka për qëllim që të bindë zyrtarët në Rusi që t’i bashkohen fushatës së udhëhequr nga Perëndimi për sanksione të reja kundër Iranit, për shkak të vazhdimit të procesit të pasurimit të uraniumit. Një zyrtar izraelit, i cili deshi të mbetet anonim, deklaroi se Netanyahu do ta ketë mjaft vështirë që të joshë zyrtarët rusë, të cilët janë duke ndihmuar Iranin në ndërtimin e një reaktori bërthamor në qytetin Bushehër dhe të cilët deri me tani kanë ngurruar që të mbështesin përpjekjet për vendosjen e sanksioneve të reja kundër Iranit.

Do të jetë kjo vizita e parë zyrtare e Netanyahut në Rusi, në cilësinë e kryeministrit. Në shtator të vitit të kaluar, ai zhvilloi një vizitë të fshehtë në Rusi, e cila zgjati më pak se 24 orë. Vizita e Netanyahut në Moskë vjen në momentin kur u zbulua informata se dy anije izraelite e kanë kaluar kanalin e Suezit javën e kaluar dhe se pritet që këto anije gjatë ditëve në vijim të hyjnë në ujërat jugore të Iranit. Kjo informatë u zbulua nga ana e burimeve detare në Egjipt, të cilat theksuan se Kajroja ka ndërmarrë masa të ashpra të sigurisë, për të garantuar kalimin e sigurtë të anijeve izraelite nëpër kanal./g.express/