Kosovë

Përkujtohen tre dëshmorët e kombit në Podujevë

E premte 3 Shkurt 2012 14:08

Me rastin e pesëmbëdhjetë vjetorit të rënies heroike të tre dëshmorëve të kombit: Zahir Pajaziti, Edmond Hoxha dhe Hakif Zejnullahu, Asociacioni për Kulturë, Edukim dhe Arsim (AKEA) ka mbajtur një manifestim përkujtimor në Podujevë.

Në këtë program kulturor-artistik përveç qytetarëve, nxënësve dhe studentëve nga mbarë trojet shqiptare qenë të pranishëm edhe familjarë të dëshmorëve, bashkëluftëtarë, ish-ushtarë të Ushtrisë Çlirimtare të Kosovës, profesorë, autorë, përfaqësues institucionesh, gazetarë, etj.

Në fjalimet e tyre familjarët e dëshmorëve, bashkëluftëtarët dhe organizatorët e këtij tubimi shpalosën vizionin atdhedashës që Zahiri, Edmondi dhe Hakifi me trimëri dhe vendosmëri të pashoqe e bartën në nivel organizativ atëbotë kur Kosova ishte nën zinxhirët e okupimit serb si dhe theksuan rëndësinë e përkujtimit të dëshmorëve të kombit.

Në kuadër të këtij programi u bë ndarja e tri çmimeve të para për ese dhe poezi nga konkursi letrar që qe hapur enkas për këtë përvjetor. Me këtë rast nga esetë dhe poezitë më të mira të këtij konkursi u botua dhe u shpërnda libërthi më i ri për dëshmorët ‘Rruga më e mirë, pa thënë lamtumirë”.

Recitalet dhe këngët kushtuar këtyre tre dëshmorëve dhe shfaqja- performanca artistike me motive të ngjashme si dhe shfaqja e recitalit “Letër Zahirit tim” të shkruar nga autori Fatmir Muja, interpretuar nga artisti Ismet Azemi përmblodhën anën artistike të këtij tubimi përkujtimor./mesazhi/B.Halili/

.

.