Kulturë

Prej tjetres javë nis aplikimi për Universitetin Veror

E enjte 15 Prill 2010 15:48

Këtë vit Universiteti Veror do të shtojë numrin e kurseve. Drejtori i Zyrës për Marrëdhënie me Jashtë në Universitetin e Prishtinës, Lulzim Pllana, bëri të ditur se ky universitet kësaj radhe do të jetë më i shkurtër, por më i larmishëm.

Aplikimi për studentë, të cilët janë të interesuar të marrin pjesë në Universitetin Veror të Prishtinës, do të fillojë nga java e ardhshme.

Kurset që do të ndjekin studentët do të jenë nga lëmi i drejtësisë, ekonomisë, shkencave shoqërore, natyrore, mjekësisë, inxhinierisë, arkeologjisë, e shumë të tjera. Sipas drejtorit për marrëdhënie me jashtë, interesimi për Universitetin Veror gjithmonë është shumë i madh. Për këtë vit parashikohet që për çdo kurs të ketë nga 20 studentë.

Organizatorët thonë se do të jenë 250 deri në 300 studentë nga Kosova, që do të marrin pjesë në Universitetin Veror, ndërkaq pjesa tjetër do të jenë nga vendet e rajonit, Evropës si dhe kontinentet e tjera.

Sa i përket studentëve nga vendet e rajonit, Universiteti i Prishtinës do të ndajë bursa, që përfshijnë udhëtimin dhe akomodimin, ndërsa të tjerët do t’i mbulojnë shpenzimet vet. Studentët e huaj gjatë periudhës së Universitetit veror, do të vendosen në një konvikt në Qendrën e Studentëve në Prishtinë, ku përveç kurseve, programi do të përfshijë edhe forume publike, program shoqëror dhe rekreativ.

Për çdo kurs do të ketë nga një profesor ndërkombëtar dhe një vendas. Zakonisht mbështetjen e këtij Universiteti e kanë bërë donatorë të ndryshëm, ndërkaq këtë vit do të jetë vetëm Universiteti i Prishtinës./rtk/