Maqedoni

Premtime të rreme për azil

E marte 2 Mars 2010 13:03

 

Raportuesja e Parlamentit Evropian për liberalizimin e vizave Tanja Fajon, i bëri thirrje autoriteteve në Maqedoni dhe në Serbi që të bëjnë fushata informative, përmes së cilave do të njoftohen qytetarët për ekzistimin e agjencisë, e cila duke i marrë para i jep premtime të rreme për një jetë më të mirë në vendet perëndimore.

Lidhur me druajtjen se rritja e numrit të kërkesave për azil në Belgjikë, të parashtruara kryesisht nga shqiptarët e Maqedonisë dhe Serbisë Jugore, do ta kanosin liberalizimin e vizave, Fajon theksoi se ende nuk është debatuar për masat e mundshme, por se është e nevojshme që të vendoset një kontroll më i fortë në kufi dhe të përforcohen kushte për hyrje.

Ky problem siç tha ajo, mund të paraqitet edhe në vendet që janë në rrugë për të marrë regjimin pa viza.

"Momentalisht jemi në mes të përgatitjeve për liberalizimin e vizave për Bosnjë e Hercegovinën dhe Shqipërinë. Nëse tani kemi ndikim negativ për shkak të ardhjes masive në Belgjikë, vendet-anëtare të BE-së do të jenë akoma më të shqetësuar dhe kam frikë se kjo do të sjellë edhe ngadalësimin e procedurës" theksoi ajo për Radion "Dojçe Vele".

Komisioni Evropian dhe autoritetet e Belgjikës tashmë ndërmorën hapa që ta shqyrtojnë problemin dhe të ulin dyndjen e azilantëve. Ekziston dyshim se pas kësaj ardhjeje masive fshihet një rrjet i organizuar kriminelësh. /alsat-m/