Kosovë

Presidentja të përfshihet në procesin historik

E premte 10 Shkurt 2012 11:09

 

Derisa kryeministri Hashim Thaçi po vazhdon takimet me përfaqësues partiakë për përmbylljen e procesit të pavarësisë së mbikëqyrur, pothuajse jashtë këtij zhvillimi po qëndron presidentja Atifete Jahjaga. Presidentes duket se po i mjafton qëndrimi në zyrë pa u përzier shumë në punët e shtetit, ndërsa rolin e figurës unifikuese tashmë e ka marrë në duar kryeministri, i cili ka arritur të tubojë liderët e partive për të diskutuar “çështjet madhore”.

Mirëpo, nevojën për përfshirje më të madhe të presidentes e kanë theksuar përfaqësues të partive të pozitës dhe opozitës. Deputeti Arsim Bajrami nga PDK, ka thënë se Jahjaga duhet të inkuadrohet në të gjithë këtë proces historik.

“Është më së e rëndësishme që edhe presidentja të kyçet në këtë proces duke e ditur madhështinë dhe rëndësinë e tij. Deri më tani, nuk është ftuar ngase realisht ky proces është duke u udhëhequr nga Qeveria e Kosovës, por gjithsesi ajo do të duhej të dalë me një qëndrim të vetin rreth këtij procesi”, ka thënë Bajrami për Express, ndërsa ka shtuar se me përmbylljen e misionit të ICO-së, disa kompetenca si ato në fushën e sigurisë, do t’i kalojnë presidentit të shtetit.

Dardan Molliqaj nga Lëvizja “Vetëvendosje” ka thënë se nuk pret që Jahjaga të dalë me një qëndrim në lidhje me proceset politike në vend.

“E çuditshme është mënyra se si është zgjedhur ajo si presidente e Kosovës. Tash me këtë pasojë prej mënyrës së zgjidhjes ne as që mund të presim diçka nga ajo dhe për atë mendoj se nuk ia vlen as të komentohet për qëndrimet e saj, sepse nuk shquhet presidentja e Kosovës për qëndrimet e saj”, ka deklaruar ai.

Nga ana tjetër, deputeti i LDK-së, Lutfi Haziri, e ka komentuar me ironi heshtjen e presidentes, duke thënë se kryeministri Thaçi po e luan edhe rolin e saj.

“Po shiko, realisht Hashim Thaçi është duke e krye rolin edhe të kryeministrit edhe të presidentit... Për çdo proces dhe ç’do ndodhë në Kosovë, ajo është e vonuar. Deklarata dhe qëndrime politike duhet të ketë gjithmonë, edhe sidomos për procese të rëndësishme, sidomos nga presidenti. Realisht ajo me statusin që e ka dhe me pozicionin që e ka është duke bërë mjaftueshëm. Me vetë faktin që nuk është involvuar nuk duhet të reagojë për diçka, por, procesi i përmbylljes së pavarësisë së mbikëqyrur është ndodhi kryesore e këtij viti dhe natyrisht pritet që ajo të dalë me një qëndrim, por tash i ka humbur edhe kuptimi, i ka humbur rrjedha edhe reagimit”, ka thënë Haziri.