Kosovë

Projekte të përbashkëta mes Kosovës dhe Turqisë në fushën e kulturës dhe trashëgimisë

Ministri i Kulturës, Rinisë dhe Sportit, z.Memli Krasniqi ka pritur sot në një takim ambasadoren e Turqisë në Kosovë, znj.Songul Ozan, me të cilën kanë biseduar për  realizim të projekteve të përbashkëta në kulturë dhe trashëgimi kulturore.

Në fushën e kulturës u bisedua ne veçanti për organizmin e “Javës së Filmit Turk” si dhe për një “Jazz Festival”, që pritet të mbahet nga fundi i këtij muaji. Po ashtu është folur edhe për dy projekte në trashëgimi kulturore që pritet të realizohen nga Agjencia Turke për Zhvillim dhe Bashkëpunim Ndërkombëtar -  TIKA- , konkretisht restaurimi i Tyrbes së Bajraktarëve dhe Xhamisë së Jashar Pashës, për të cilat vitin e kaluar janë nënshkruar dy memorandume mirëkuptimi.

Ministri Krasniqi në këtë takim vlerësoi se bashkëpunimi mes dy vendeve, në fushën e kulturës dhe trashëgimisë kulturore deri më tani ka qenë mjaftë i mirë, duke shfaqur dëshirën që ky bashkëpunim të thellohet. Ai njoftoi ambasadoren me të arriturat që janë shënuar vitin e kaluar si dhe me prioritetet në këtë vit.

Edhe ambasadorja, znj. Songul Ozan e vlerësoi lartë bashkëpunimin duke theksuar nevojën që ai të rritet. Ajo tha se Turqia është një vend mik i Kosovës dhe do të vazhdojë të japë kontribut në zhvillimin e shoqërisë së Kosovës. /mkrs/

•  
•