Ekonomi

Qeveria mëton t’i demantojë pohimet për tokën e kontaminuar

E marte 21 Shkurt 2012 9:41

Ministria e Bujqësisë, e Pylltarisë dhe e Zhvillimit Rural nuk do të heshtë përballë të dhënave në raportin e ELUP-it (Projekti për mbështetje e përdorim të tokës), ku thuhet se toka bujqësore në Kosovë është e kontaminuar. Të dhënat e publikuara po synohet të demantohen shkencërisht, nga Ministria e Bujqësisë. Ministri Blerand Stavileci të hënën ka pohuar para deputetëve të Komisionit parlamentar për Bujqësi, ku ishte ftuar të diskutohej në lidhje me këtë raport, se tashmë është iniciuar procesi i analizimit në aspektin shkencor i të dhënave të raportit, duke shtuar se ato nuk përkojnë njëra me tjetrën.

“Rezultatet dhe konkludimet e dhëna në raport nuk përkojnë me njëri- tjetrin, dhe ky është vetëm një fakt se aty ka shumëçka të pavërtetë”, ka deklaruar ministri Stavileci.

Konstatimet e tij bashkë me informatën se Ministria do ta çojë deri në fund nismën për të demantuar raportin, i kanë mbështetur haptas deputetët e partive opozitare që përfaqësojnë në këtë Komision, “Vetëvendosjes” dhe LDK-së, kurse ata të AAK-së kanë munguar në këtë mbledhje./Koha/