Maqedoni

Qeveria s`ndërmerr masa për ngjarjet në Strugë

Qeveria e Maqedonisë akoma nuk ka shprehur ndonjë qëndrim apo vlerësim zyrtar lidhur me tensionet e fundit dhe incidentet në rajonin e Strugës.

E marte 31 Janar 2012 10:57

Mbrëmë në fshatin Labunishtë u dogjën ambientet ndihmëse të kishës "Shën Nikolla" të fshatit, ndërsa me ndërhyrjen e shpejt të banorëve lokal dhe zjarrëfikësve zjarri është lokalizuar dhe nuk ka pasur asnjë dëm të shkaktuar në brendinë dhe pjesën e jashtme të kishës.

Kryeministri Nikolla Gruevski po vijon vizitën e tij në Turqi, ndërsa deri tani Qeveria nuk ka mbajtur ndonjë seancë të jashtëzakonshme për të hartuar strategji për uljen e tensioneve dhe rritjen e kapaciteteve për siguri dhe mirëbesim ndëretnik. Në rajonin e Strugës deri tani nuk ka qëndruar asnjë nga ministrat e Qeverisë.

Zëvendëskryeministri Musa Xhaferi dje bëri thirrje për mobilizim të të gjitha forcave konstruktive për të ruajtur stabilitetin e përgjithshëm dhe për të mos u bllokuar proceset integruese.

Kryetari i komunës së Strugës, Ramiz Merko ka dënuar aktet e fundit të dhunës dhe sidomos tentimin për djegien e kishës në Labunishtë, duke bërë thirrje për ulje të tensioneve. Ai me këtë rast ka fajësuar komunën e Vevcanit si katalizatore të incidenteve dhe tensioneve të fundit.(INA)