Kosovë

Sejdiu meriton mandat të ri në krye të LDK-së

E mërkure 1 Shtator 2010 16:45

 

Pas mbledhjes së grupit për zgjedhje të LDK-së, ai ka dhënë një përgjigje interesante kur është pyetur nëse ministri i Shëndetësisë, Bujar Bukoshi, ka të drejtë të kandidojë për kryetar të LDK-së. “Për cilin Bukosh është fjala?”, është përgjigjur Kryeziu.

Për më shumë, Kryeziu është në dilemë edhe më të madhe tash, pas deklarimit të sekretarit të përgjithshëm të LDK-së, Ramë Manaj, i cili për Bujar Bukoshi ka thënë se nuk është as anëtar i LDK-së.

Kryeziu ka thënë se Bukoshi ka të drejtë kandidimi për lider të LDK-së, por është parë i buzëqeshur kur është pyetur edhe për inkuadrimin në LDK të Ukë Rugovës, djalit të ish-kryetarit të LDK-së, Ibrahim Rugova. “Secili kur mbush 18 vjet ka të drejtë të zgjedhë e të zgjidhet”, është shpreh ai.

Ndërkohë, në selinë e LDK-së është takuar grupi për zgjedhje i kësaj partie, ku përveç Eqrem Kryeziut, të pranishëm të tjerë kanë qenë anëtari i Kryesisë së LDK-së, Astrit Haraqija, ministri Lutfi Zharku dhe deputeti Armend Zemaj.

Është mësuar se propozimet e grupit për zgjedhje pritet të diskutohen nesër, kur pritet të mblidhet Kryesia e LDK-së, ndërkohë që Kryeziu është shprehur se Fatmir Sejdiu meriton të ketë edhe një mandat tjetër në krye të partisë.

LDK-ja ka për kryetar Fatmir Sejdiun, ndaj të cilit deputetë të Kuvendit kanë kërkuar interpretim ligjor nga Gjykata Kushtetuese nëse ka të drejtë të mbajë dy poste, atë të kryetarit të shtetit dhe liderit të LDK-së. Kryeziu tha se Fatmir Sejdiu ishte kryetari i parë i LDK-së që u zgjodh me votën e fshehtë të anëtarëve, ndryshe nga Rugova që vazhdimisht është zgjedhur me aklamacion. /Koha/