Shqipëri

Shqipëri: KQZ ka rënë në “hall” për kutitë e votimit

Tashmë kur është dekretuar data e zgjedhjeve lokale, Komisioni Qendror i Zgjedhjeve ka nisur tentativat për të boshatisur kutitë e votimit. Por nëse nga njëra anë ligji e “detyron” KQZ-në që të ndërmarrë hapa për djegien e fletëve të votimit, nga ana tjetër, Partia Socialiste e ka vënë si kusht kryesor mos djegien e tyre.

E mërkure 8 Shtator 2010 12:08

Sipas kësaj partie nëse një veprim i tillë do të ndodhë, atëherë bien të gjitha shanset për gjetjen e një kompromisi.

Siç raporton Gazeta Start, kreu i KQZ-së, Arben Ristani deklaroi se duhen tre muaj të paktën për të zbrazur kutitë e materialeve zgjedhore, duke seleksionuar ato materiale që janë të vlefshme. E pas kësaj, ai sqaron se duhet të përgatitet fondi për materialet e reja.

“Janë 10 mijë kuti, dhe nga praktika e KQZ, që e ka bërë këtë procedurë edhe më parë, do 2-3 muaj kohë, që të hapen kutitë dhe të seleksionohet materiali. Dhe përsëri praktika ka treguar se duhen rreth një muaj e gjysmë kohë për t’i rimbushur kutitë për t’i bërë gati për zgjedhje. Pra e gjithë kjo procedure, është një procedure që kërkon, me siguri, 5-6 muaj. Jemi në kufijtë e të mundshmes për organizimin e zgjedhjeve. Puna e KQZ është e tillë që nuk ka kohë për të korrigjuar gabime. Në rast se bëhet një gabim, dështojnë zgjedhjet”, thotë Ristani.

Ai ka paralajmëruar se deri në fund të këtij muaji, institucioni i zgjedhjeve duhet të marrë një vendim për kutitë.

Teksa nuk shihet ndonjë shenjë për zgjidhjen e ngërçit politikë, KQZ-ja ka rënë në “hall” se si duhet të veprojë me to, duke marrë parasysh se ligji i jep të drejtë këtij institucioni të boshatis kutitë.

Nga ana tjetër, ish-kreu i KQZ-së, Kristaq Kume, thotë se shpallja e datës së zgjedhjeve bëhet në një situatë shumë të vështirë politike kur akoma nuk është zgjidhur problemi se çfarë do bëhet me kutitë që mbajnë fletët e votimit.