Maqedoni

Shtohen incidentet rriten tensionet në Strugë

Pas demolimit të ambulancës private “Meniks” në fshatin Llabunishtë, dhe përdhosjes së kishës në fshatin Borovec, incidentet shtrihen edhe në fshatin Oktis.

E hëne 30 Janar 2012 10:31

Sipas informacioneve të policisë, e cila ka krijuar një një ekip të veçantë për përcjelljen e situatës në komunën e Strugës, persona të panjohur, gjatë orëve të mbrëmjes së djeshme, kanë shkruar grafite që fyejnë ndjenjat e banorëve të këtij fshati i banuar me popullatë të përzier. “Kaur, për ju vetëm vdekje” është shkruar në muret e kishës “Shën Nikolla” në këtë fshat që ka shkaktuar reagime.

Policia ka dalë menjëherë në vendin e ngjarjes dhe ka bërë veprimet e duhura. Për të siguruar qetësinë dhe sigurinë në këtë fshat, lokacionin rreth kësaj kishe, e kanë ruajtur policia.

Incidentet, edhe pse mund të quhen të izoluara, ose vepër e “adoleshentëve”, ose të “dehurve”-siç thuhet shpesh në njoftime, po shtohen, që rrisin tensioned ndëretnike dhe ndërfetare në komunën e Strugës.

Këto ngjarje kanë qënë shkas që të takohen edhe anëtarët e Komisionit për marëdhënie ndëretnike, ndërsa reagimet kanë pasuar edhe nga disa parti politike dhe shoqata joqeveritare. (M.Latifi/INA)