Rajon dhe Botë

Spanjë: E “pamjaftueshme” deklarata e ETA-s për armëpushim

Spanja ka reaguar me skepticizëm ndaj njoftimit të organizatës ilegale baske ETA për një armëpushim në të ardhmen nga ana e saj.

E hëne 6 Shtator 2010 10:37

Si qeveria në Madrid, ashtu dhe qeveria rajonale në territoret baske e cilësuan deklaratën e ETA-s si të “pamjaftueshme”. Në të njëjtën kohë ata kërkuan nga separatistët të heqin dorë përfundimisht nga dhuna.

Deutsche Welle raporton se ministri i Brendshëm bask Rodolfo Ares e quajti deklaratën e ETA-s si të pamjaftueshme “Deklarata është absolutisht e pamjaftueshme, sepse ne kërkojmë dhe presim që ETA t’i japë fund përgjithmonë aktiviteteve të saj terroriste. Qeveria baske, Ministria e Brendshme, policia, qeveria spanjolle dhe forcat e sigurisë nuk do të ushtrojnë asnjë armëpushim nga ana e tyre”.

Në një mesazh përmes një videoje ETA më parë kishte bërë të ditur se ajo është e gatshme që të nisë një “proces demokratik” për krijimin e një shteti të pavarur në territoret baske.

Ndryshe, ETA lufton që prej katër dekadave për pavarësinë e territoreve baske në veri të Spanjës dhe në jugperëndim të Francës. Ajo konsiderohet si përgjegjëse për vdekjen e 850 personave. /Telegrafi/