Kosovë

Sulmohet ekipi i Klan Kosova në Ferizaj

Ekipi televiziv i Klan Kosovës është sulmuar fizikisht derisa ai po xhironte në oborrin e shkollës fillore në Ferizaj “Gjon Sereçi”.

E mërkure 8 Shtator 2010 12:53

Drejtori i kësaj shkolle, Milazim Durguti, për më shumë se 40 minuta ka mbajtur të ngujuar në një klasë gazetaren Valentina Ahmeti dhe kameramanin Arben Restelicën duke u munduar me dhunë që ekipit të Klanit t’ua marrë materialin e xhiruar.

Siç raporton Klan Kosova, drejtori ka nxjerrë të gjithë nxënësit e shkollës jashtë dhe ka sulmuar kameramanin Restelica. Ekipi ka arritur të thërras policinë të cilët kanë ardhur në vendin e ngjarjes, duke shoqëruar drejtorin në polici.

Ekipi i Klan Kosovës, ka ngritur padi për sulm ndaj Durgutit, ndërkohë që edhe ky i fundit ka paditë TV Klanin për xhirime të paautorizuara.

Klan Kosova, ishte në këtë shkollë për të hulumtuar veprimet e fundit të drejtorit Durguti, i cili u ka ndërruar vendin e punës një numri të madh mësimdhënësish.

Ndryshe në orën 13:00 pritet të mbahet një protestë, ku mësimdhënësit, familjarët e tyre dhe nxënësit do të kundërshtojnë vendimin e drejtorit për ndërrimin e vendit të punës që ai po u bënë mësimdhënësve. /Klan Kosova/