Shkencë

Turqia po numëron ditët për raketën cruise me rreze veprimi 2.500 km

Synohet që deri në vitin 2014 rrezja e veprimit të kësaj rakete të jetë 2.500 km.

Këtë objektivë e tregoi Kryeministri turk, Rexhep Tajip Erdoan, i cili mori pjesë në Këshillin e Lartë Teknologjiko-Shkencor.

Raketa në fjalë quhet "Municion Stand-Off i Telekomanduar me Precizion të Lartë", ose shkurtimisht SOM...

Në kuadrin e nevojave të Forcave Ajrore Turke, kjo raketë u prodhua për të goditur objektivin e parapërcaktuar me një precizion të lartë, pa hyrë avionët në rrezen e veprimit të sistemeve të mbrojtjes ajrore armike.

Ky sistem raketor, që aktualisht është zhvilluar me 3 versione, për momentin ka rreze veprimi mbi 180 km.

Raketa "cruise" kombëtare turke, SOM, për herë të parë iu prezantua opinionit publik në një avion F-16 të Flotës Xhejlan gjatë Shfaqjes Ajrore të Turqisë, që u realizua vitin e kaluar në Izmir.

Instituti i Kërkim-Zhvillimit të Industrisë së Mbrojtjes (SAGE) pranë TUBITAK-ut, i cili punimet e tij në këtë fushë i vazhdon prej tashmë 6 vjetësh, aktualisht e ka rritur rrezen e veprimit të raketës SOM në 300 km.

Por pritshmëria e Turqisë për rrezen e saj të veprimit është e lartë.

Vet Kryeministri Rexhep Tajip Erdoan, në mbledhjen e Këshillit të Lartë Teknologjiko-Shkencor të Turqisë, kërkoi që rrezja e veprimit të raketës SOM të rritej në 2.500 km.

Në bazë të kërkesës së kryeqeveritarit turk, SAGE brenda këtij viti do të fillojë testimet për 500 km; pastaj rrezja e veprimit do të rritet në 1.500 km, ndërsa në vitin 2014 do të arrihet objektivi 2.500 km./trt/

•  
•