Kulturë

U shfaq premiera e filmit më të ri, “Hakmarrja”

E hëne 11 Janar 2010 22:41

 

Nga: Blerim Halili, Prishtinë

Në kinemanë ABC në Prishtinë, në prani të shumë dashamirëve të filmit, artit dhe kulturës, të dielen, më 10 janar, u shfaq premiera e filmit më të ri “Hakmarrja” nën regjinë e Alban Selimit.

Në fillim para të pranishmëve foli regjisori dhe skenaristi i filmit, 19 vjeçari, Alban Selimi, i cili dha sqarimet për motivin e tij për t’u marrë me aktrim, me sportet marciale dhe për të realizuar një film të tillë, foli për vështirësitë e realizimit, pengesat dhe vullnetin e madh, etj.

Ndërkohë gjatë fjalimit të tij, “Qëndrimi” (emri i personazhit të tij në film), “u pengua” nga njerëzit e “Bossit” dhe pas një rrahjeje me ta para publikut, pasi i la përtokë, del edhe vetë “Bossi”. Në pritje të “boksit” të parë ndaj njëri tjetrit, ata përkundrazi i shtrinë dorën njëri-tjetrit dhe u përshëndetën para publikut në sallën e kinemasë. Kjo ndoshta qe edhe pika më interesante që u përcoll me më së shumti duartrokitje të publikut.

Më pas për një fjalë rasti u pronocua edhe trajneri i “aktorëve” përkatësisht, Nuhi Gashi, drejtor i klubit të Taekwondosë “Prishtina” që dha disa shpjegime për “luftrat” përgjatë filmit dhe realizimin e tij. Ngase, e veçantë e filmit është se, për herë të parë tek ne, realizohet një film që përmban edhe sportet marciale, përkatësisht sportin e Teakwondosë.

Në fund para publikut u shfaqën të gjithë aktorët dhe pjesëmarrësit e filmit dhe përshëndetën e falënderuan publikun, dhe kështu me një koktej rasti përfundoi edhe kjo premierë.

Filmi është i realizuar nga aktorë të rinj, dhe ngërthen tematikën e problemeve dhe dukurive negative, infiltrimin e të rinjve në botën e drogës, bixhozit, zënkave dhe deformite tjera shoqërore që çojnë edhe deri në vrasje.

I mbështetur në shumë parametra realë, filmi pasqyron edhe tablonë faktike të gjendjes së rinisë në Kosovë, përmasat e përhapjes së dukurive negative dhe pasojat që sjellin ato.

Filmi “Hakmarrja” me mesazhin që jep, shënon një përpjekje në vete për vetëdijesimin e rinisë, braktisjen e rrugës së “bixhozit” dhe kthimin tek njerëzorja, vlerat morale dhe shpirtërore tashmë të lëna në harresë, pasojë e së cilës janë të gjitha këto deformitete.