Kosovë

Uka nuk bën të mbështetet në emrin e Ibrahim Rugovës

Vendimi i Ukë Rugovës, djalit të dytë të presidentit të ndjerë, Ibrahim Rugova, për t’u marrë me politikë, nuk është pritur me entuziazëm të madh nga LDK-ja.

E marte 31 Gusht 2010 10:59

Burime nga kjo parti, i kanë thënë Klan Kosovës, se kryesia e ngushtë e LDK-së, nuk e kanë mirëpritur vendimin e Ukë Rugovës për t’u bërë pjesë e LDK-së.

Këtë e ka vërtetuar edhe sekretari i përgjithshëm i LDK-së, Ramë Manaj, i cili në një intervistë për Klan ka thënë se nuk do të thotë asgjë, nëse ai është djali i presidentit të ndjerë.

Manaj tha se të qenit djalë i themeluesit të LDK-së, nuk do ta ndihmojë atë në rrugën e tij të nisur. Suksesi i tij në politikë, siç tha Manaj, varet nga angazhimi i tij dhe kontributi i dhënë në këtë drejtim e jo fakti se është djali i Ibrahim Rugovës.

Manaj, kërkon nga Ukë Rugova, të ketë kujdes që në rrugën e tij politike, të mundohet ta ruaj figurën e Ibrahim Rugovës.

Ukë Rugova ka pranuar publikisht se do të fillojë të merret me politikë. Dhe padyshim LDK-ja, partia që e udhëhoqi i ati, për gati dy dekada, do të jetë streha e tij.

Në një intervistë dhënë të përditshmes, Express, ai ka shuar të gjitha dyshimet rreth të ardhmes politike të tij dhe familjes. “Unë i përkas Lidhjes Demokratike të Kosovës”, ka thënë Ukë Rugova.