Kulturë

Ulqini dhe Prizreni pushtohen nga librat

E enjte 29 Korrik 2010 11:53

Është çelur dje në mbrëmje në Ulqin edicioni i dhjetë i Panairit të Librit nga katër ministrat e Kulturës së katër vendeve të rajonit, Malit të Zi, Shqipërisë, Kosovës dhe Maqedonisë.. Kjo është ngjarja më e rëndësishme kulturore e vitit në Ulqin, e cila tradicionalisht organizohet nga Komuna e Ulqinit në bashkëpunim me Shoqatën e Botuesve Shqiptarë nga Shqipëria. Shkrimtari Besnik Mustafaj do të jetë i ftuari i nderit për edicionin e sivjetshëm të Panairit të Librit.

Mbi 60 botues do të marrin pjesë gjatë ditëve të panairit, ose do të dërgojnë botimet e tyre më të mira të përfaqësuara nëpërmjet agjencive të shpërndarjes së librit. Veç librave nga Shqipëria, Kosova e Maqedonia, do të ekspozohen libra e do të marrin pjesë botues edhe nga Mali i Zi, Bosnja e pakicat e tjera kombëtare të kësaj republike.

Në këtë edicion të dhjetë, i cili do të zgjasë deri më 4 gusht, parashikohet të ekspozohen dhe të ofrohen për shitje mbi 6000 tituj librash, nga të cilët mbi 500 janë tituj të rinj. Letërsi artistike, autorë shqiptarë e të huaj, histori, botime enciklopedike, guida turistike e harta të çdo lloji, letërsi për fëmijë, fjalorë e metoda për mësimin e shqipes dhe të gjuhëve të huaja, që do të paraqiten para lexuesve ulqinakë e pushuesve të huaj.

Ndërkaq sot pritet të hapet Panairi i Librit në Prizren, i cili synon të jetë tradicional. Në edicionin tij të dytë, që organizohet nga OJQ, “AKEA”, është paraparë që të marrin pjesë 20 Shtëpi Botuese nga të gjitha trevat shqiptare. Ky panair përmbyllet me 2 gusht, për t’i lënë të hapur rrugën panaireve të tjera që do të mbahen në qytetet jugore të Shqipërisë./botasot/