Maqedoni

Vazhdojnë skandalet me librat shkollor

E enjte 26 Gusht 2010 16:11

Ministria e Arsimit e Maqedonisë vazhdon politikën shpërfillëse ndaj shqiptarëve, duke dëshmuar implikimet politike anakrone dhe retrograde në arsim.

Pas skandalit me librin shkollor “Shoqëria”, ku Kosova ende paraqitej si pjesë e përbashkët e Serbisë, zbulohet skandali tjetër në përmbajtjen e teksteve shkollore në Maqedoni.

Sipas librit “Gjeografia”, nga i cili mësojnë nxënësit e shkollave të mesme që nga viti 2003, “vendosja e shqiptarëve në Maqedoni ka filluar para 220 vjetëve nga Shqipëria dhe Kosova dhe kjo vendosje që akoma vazhdon, është e rrezikshme për Maqedoninë”.

Në libër gjithashtu shkruhet se “shqiptarët e Maqedonisë që e llogarisin veten si autoktonë, kryesisht janë popullsi maqedonase që gjatë periudhës së sundimit turk kanë pranuar fenë islame dhe janë shqiptarizuar”.

Më tej autorët e këtij libri kanë shkruar se, midis tyre, ka edhe ndonjë fis që ka prejardhje turke dhe rome ose çerkeze. (INA)