Artikuj

Ishim dëshmitar të lajmeve që po na vinin këto ditë rreth vizitës së Presidentes së Kosovës Atifete Jahjaga së bashku me Besim Beqaj, ministri për zhvillim ekonomik, e shoqëruar edhe nga i ngarkuari me punë në ambasadën e Republikës së Kosovës në Arabinë Saudite.

Qëllim i vizitës së Presidentes në këtë takim ishte pjesëmarrja në ndarjen e çmimit vjetor që bëhet për nderë të Sheyh Zayed për Energjinë e së Ardhmes, që llogaritet si një çmim i një rëndësie të veçantë për sukseset e arritura si në aspektin individual apo grupor në fushën e energjisë alternative.

Për të dëshmuar rëndësinë e kësaj ceremonie, ishin pjesëmarrës personalitete më me famë botërore si Ban Ki Moon, Tony Bleir, Presidenti i Islandës, e shumë e shumë personalitete të tjera.Më së shumti bum në tërë këtë lajm ishin disa foto të publikuara nga presidenca e Kosovës, ku Presidentja Jahjaga shfaqej me një fustan të shkurtër si përzgjedhje e saj për pjesëmarrje në këtë ceremoni.Ndërsa më vonë presidenca u akuzua edhe për censurimin e disa fotove, si dhe për përpjekjet e bëra për ta ''mbuluar'' sado pak Presidenten dhe marrën e saj, duke shfaqur foto në të cilat Presidentja dukej vetën në pjesën e sipërme.

Çfarë donte të tregonte Presidentja me këtë veshë të saj...!!??

Presidentja me këtë pjesëmarrje ka bërë thyerjen e të gjitha rregullave së pari të shqiptarëve e mandej edhe të kanunit të Lek Dukagjinit, që siç dukej nga disa deklarata të saj ajo e njeh si ligj të vetëm, e për të vazhduar edhe me rregullat ndërkombëtare të vizitave të rangëve të tilla, duke treguar një papjekuri, naivitet, mos kulturë dhe mos respekt ndaj të tjerëve.

Kjo për faktin se deshëm apo jo, kur i shkon njeriut në konak siç thotë populli, nuk mund të bëhesh zot shtëpie por duhet të i respektosh traditat e konakut. Në vendet arabe është e njohur çështja e veshës dhe mbulesës së tyre, pa marrë parasysh se kjo është normë fetare apo traditë e tyre, andaj edhe duhet respektuar ashtu siç kishte vepruar Krye-parlamentarja e Shqipërisë zonja Topalli, e cila në vitin 2008 në një vizitë bërë Arabisë Saudite. Ajo ishte veshur si vendase për ta respektuar traditën e këtij vendi. Njesoj veproi edhe Mbretëresha Beatris e Holandës, e cila gjatë vizitës së saj në një nga xhami të Omanit, tash në janar të 2012, ishte shfaqur me një mbulesë në kokë si shenjë respekti për vizitën e saj në xhami.

Andaj do të ishte mirë që Presidentja jonë në veçanti si dhe të gjithë qeveritarët tanë në përgjithësi të marrin sado pak mësim nga këto personalitete sepse janë shtete, dhe kanë kulturë shtetërore hiç më pak se një shekull.Pra, nuk është mirë që të bëhemi si puna e atij me qershitë. E po më duket se edhe qeveritarët tanë janë duke ia bërë mu kështu, pasi që më kujtohet se Kryeministri i Kosovës pas shpalljes së pavarësisë së Kosovës, kur ishin në kërkim të njohjeve, ai në një deklaratë të dhënë kishte thënë se ''Ne jemi të nevojshëm për njohje nga vende kualitative dhe jo kuantitative'', ndërsa me kuantitative ai kishte për qëllim vendet Arabe, ndërsa sot jemi dëshmitarë se si qeveritarët tanë po vrapojnë pas njohjeve nga këto vende ''kuantitative''.

Andaj më qe ne jemi të nevojshëm për njohje dhe jemi ne ata që jemi në një pozitë më të dobët, do të ishte e udhës që të i respektojmë traditat, doket dhe zakonet e shteteve që i vizitojmë pasi që vetëm kështu do të tregonim se ne si Shqiptarë jemi më të vërtet një popull i lashtë, dhe një popull me një kulturë dhe civilizim të lashtë.