Kosovë

VV sërish në protestë, tash për Prizrenin

E premte 27 Janar 2012 14:18

 

Lëvizja Vetëvendosje fton të gjithë qytetarët e Kosovës që t’i bashkëngjiten të dielën në orën 12:00 protestës së organizuar nga qytetarët e nga shoqëria civile, në ruajtje të Qendrës Historike të Prizrenit, dhe kundër ligjit të ri që po synon të imponojë partia në pushtet.

Lëvizja Vetëvendosje e mbështet këtë protestë edhe në parim, edhe si aksion për arsye se, sipas tyre, ligji bie në kundërshtim me parimet dhe frymën republikane e me kushtetutën, ai cenon laicitetin e shtetit, cenon neutralitetin në çështje të fesë, dhe është diskriminues, “pra cenon barazinë përballë ligjit”.

Një ligj i tillë, sipas VV-së, përbën material për hapje plagësh të vjetra e të reja, duke nxitur diferencimin e dasitë në baza etnike e religjioze.

“Ndërkohë që në Kushtetutë parashihet laicizmi e neutraliteti i shtetit në çështje fetare, në ligjin që synohet të kalohet në parlament parashihet ngritja e një Komiteti që do të administrojë Qendrën Historike të Prizrenit, përbërja e të cilit do të jetë prej tre religjioneve, duke përjashtuar kështu religjione të tjera, e ç’është më e keqja, duke e zëvendësuar konceptin e qytetarisë, si koncept bashkues, me një koncept dallues, siç është religjioni”, thekson Vetëvendosje në një komunikatë për medie.

Më tej, Lëvizja Vetëvendosje konstaton me shqetësim se ky ligj cenon rëndë trashëgiminë kulturore, që i përket popullit të Kosovës, dhe e cila duhet të rregullohet e të mirëmbahet institucionalisht, sipas praktikave më të mira ndërkombëtare e kombëtare, e jo sipas dëshirës së njërit apo tjetrit komunitet.

“Ky menaxhim që propozon partia në pushtet është në kundërshtim me Konventën e UNESCO-s e me një sërë dokumentesh të rëndësishme për trashëgiminë kulturore dhe ruajtjen e saj”, vlerëson Vetëvendosje.

Ligji i ri për Qendrën Historike të Prizrenit, sipas Vetëvendosjes, mbi të gjitha përbën një akt arbitrar kundër vullnetit të qytetarëve të shprehur në aktivitete të ndryshme, por edhe në një peticion që ka mbledhur mbi 10.000 firma gjatë vitit 2011. Vetëvendosje vlerëson se kjo tendencë e rrezikshme e qeverisë “e zhbën qytetin, e zhvesh atë prej qytetarëve, e në të njëjtën kohë nxit urrejtjen e konfliktet mes tyre”.

“Projektligji jo vetëm që nuk ka marrë miratimin mbarëqytetar, por që gjatë kohës së hartimit të tij ka filluar të nxisë konflikte mes komuniteteve religjioze në qytet e më gjerë”, thekson Vetëvendosje.

Ligji në fjalë, sipas kësaj lëvizjeje, pengon tërësisht zhvillimin ekonomik dhe infrastrukturor të Qendrës së Prizrenit, dhe e merr peng këtë territor, duke ndjekur shembullin negativ të eksterritorialitetit të Kishave e Manastireve Ortodokse, që gjithashtu janë trashëgimi kulturore e Kosovës, por që janë eksterritorializuar, në emër të dasive etnike e fetare.

Andaj, për këto arsye, por edhe në respekt të vullnetit të qytetarëve e më gjerë, të gjithë shqiptarëve, Lëvizja Vetëvendosje bën thirrje që të dielën, në datën 29 janar, në orën 13:00, sa më shumë qytetarë të dalin në protestë tek Sheshi Shadërvan, në qendër të Prizrenit. /Zëri/