Shkencë

Zbulohet gjeni i plakjes së trurit

E marte 2 Shkurt 2010 19:25

 

A mund të arrihet një ditë të ndalohet mplakja e trurit dhe të parandalohen kështu sëmundjet si ajo e Alzajmerit apo e Parkinsonit? Përgjigja është po, me kusht që të arrihet të krijohet një program gjenetik që shpjegon degjenerimin dhe mplakjen e neuroneve. Në këtë aspekt një hap të rëndësishëm ka kryer një ekip kërkuesish i Universitetit të Montrealit, të spitalit Maisonneuve-Rosemont, dhe të Laërence Berkeley National Laboratory, duke evidentuar gjenin përgjegjës për plakjen normale dhe patologjike të neuroneve.

Faktori i parë i lidhur me rrezikun e sëmundjeve si Parkinsoni dhe Alzajmeri është mosha. Shumë kërkues janë duke punuar për të kuptuar më mirë aspektin gjenetik të këtyre sëmundjeve, megjithatë studimet e lidhura me aspektin e mekanizmave molekulare që kontrollojnë plakjen neuronale janë të pakta.

Ekipi i drejtuar nga Dr. Gilbert Bernier, ka identifikuar gjenin Bmi1 si një element thelbësor për të parandaluar grumbullimin e radikalëve të lirë (radikalët e lirë krijojnë paqëndrueshmëri në neuronet dhe si rrjedhojë plakjen e tyre). Bllokimi i këtij gjeni te minjtë sillte gjithnjë një përshpejtim të madh të plakjes së sistemit nervor qendror.

Si rezultat, tanimë është e sigurt që gjeni Bmi1 është një rregullues i drejtpërdrejtë i plakjes qelizore në neuronet e trurit dhe në ata të retinës së syrit tek gjitarët, nëpërmjet aksionit të tij mbi proceset e mbrojtjes kundër radikalëve të lirë.

 

Burimi: techno-science.fr

Përgatiti: Mr. Rrahman Ferizi