Mospëlqim ndaj shkrimit të Alma Lamës

Qëllimi arsyeton shkakun. Shkaku mund edhe ta gjymtojë qëllimin. Pse jo, kur nëpërmjet të vërtetës trumbetohet të arrihet e pavërteta finale. Gjatë leximit të faqeve elektronike hasa në një temë “Shamia, ana tjetër e medaljes” e shkruar nga zonja e nderuar Alma Lama. Materialin e lexova shumë herë, më pëlqeu radhitja e shkronjave, por ajo që nuk munda dot ta kuptoja ishte bërthama e shkrimit. Autore e nderuar (nuk kam idenë se kush jeni, as që do të lodhem me të) mua më intereson vetëm mendimi i krijimtarit, në rastin konkret mendimi i zonjës Alma. E nderuara, shkrimi juaj ishte një analizë, sintezë apo përshkrim i Sabiljes apo i prizrenases fiktive? Fillimisht mendoj se keni bërë disa lëshime, nuk do të thosha gabime. E para, diku në një rresht figuron fjala “devotshmëri”, sinqerisht u them se nuk e kuptova fjalën, nëse e keni fjalën për “devotshmëri”, atëherë në rregull, nëse nuk është ai kuptim ju lutem më tregoni se ç’kuptim ka fjala “devotshmëri”? E dyta, besimtarë mysliman - kërkoj ndjesë, por fare nuk e kuptoj se cilit religjion i takojnë këta besimtarë, sipas të dhënave mbi religjionet botërore nuk hasa në ndonjë fe e cila quhet fe myslimane. Mendoj se e keni fjalën për besimtarë të fesë Islame. Nga fakti se mysliman merr statusin personi i cili i nënshtrohet rregullave apo formulave Islame. Shpresoj se këtë lëshim e keni bërë pa qëllim. E treta, diku në shkrim hasa fjalën “fanatizëm” si e definoni termin fanatizëm, mesa e kuptova personi i cili zbaton rregullat Islame në mënyrë partikulare u quaka fanatik, gabim e keni ju edhe bashkëmendimtarët tuaj. Kjo ishte një pasqyrë e lëshimeve tuaja. Tani nuk do të merrem me trillime, ndonëse njihja një vajzë apo të njëjtë, mendoj se një mbirje e tregimi të tillë nuk pinë ujë tek lexuesi, e aq më pak të plasohet si një argument përkrahjeje apo sulmi. Dua të radhis disa shkronja, duke tentuar e menduar se janë në adresë të duhur: Islami synon formimin e shoqërisë së shëndosh, e mos të jepet mundësia dhe hapësira e epsheve, të nxiturit e epshit është anim dhe stimulim i epshit që nuk ndalet e nuk shuhet. Shikimi tradhtar, lëvizjet nxitëse, bukuria e shfaqur, trupi i zhveshur, kjo nuk është tjetër përpos epsh shtazarak që nga kjo rezulton shfrenimi. Ajo çka duket nga bukuria që lejohet të shfaqet është fytyra dhe duart, e kjo është në bazë të hadithit (thënie e Profetit tonë të fundit), ku Pejgamberi a.s i tha Esmas vajzës së Ebu Bekrit “ oj Esma, gruaja nëse arrin moshën e pjekurisë nuk i lejohet asaj t’i duket përpos kësaj e kësaj (bëri me shenjë ka fytyra dhe duart).

Pra, mbulesa është pastërti për zemrat e besimtareve, ngase nëse nuk shikon syri, zemra nuk e kërkon mëkatin, kurse nëse e sheh syri mund ta kërkoj zemra. Për këtë shkak kur nuk sheh, është më pastër për zemrën dhe nuk mund të biesh në çorodi, ngase mbulesa i ndërpret dëshirat e atyre që i kanë zemrat e sëmura. Sidoqoftë, mbulesa sipas rregullave të Islamit paraqet një akt i cili duhet zbatuar, e pëlqejmë apo nuk e pëlqejmë, e tëra ajo është (i)relevante. Por, nëse nuk gaboj mendoj se ata të cilët nuk e përkrahin këtë rregull më së paku kanë të drejtë të flasin rreth kësaj çështjeje. Këtu ka dy zgjidhje, e merr apo i shmangesh. Për arsye se e drejtë e çdo personi është të zbaton, apo nuk mos ta zbaton. Por, ajo që nuk kapërdihet është të debatohet mbulesa, nga fakti se ai është një rregull nga Libri i Shenjtë Kur’ani. E nderuara zonja Lama ju dhe ai ministri juaj, i cili sipas fizionomisë së lapsit tuaj nuk keni erë në këtë fushë, më së paku keni të drejtë të bisedoni rreth këtij problemi. Kërkoj ndjesë, por ky do të ishte një sugjerim i adresuar ndaj personave të lartcekur!

Të nderuar lexues, nuk dua të merrem me grupin protestues se kush ishin ata? E nderuara autore dyshoj (siç do të ishte shprehur filozofi i quajtur Aristotel) se do të kishte qenë më mirë për ju të merreni me një temë tjetër, temë kjo e cila po na ngulfat, por që nuk duam ta shohim. Tema ka të bëjë me fasadimin e muzikës shqipe. Vallë pse nuk harxhoni energjinë tuaj të dhuruar lidhje me këtë? Apo e tëra është në rregull? Vallë nuk është mëkat ndaj artit shqiptarë ajo që ndodhë me këngëtaret tona? Do të ishte më mirë t’i thoshim NDAL këngëtareve tona me lakuriqësinë e tyre të paparë. A thua nuk është kjo muzikë pa melodi dhe këngë pa tekst? Me shumë keqardhje shprehi mendimin se sot muzika shqipe shikohet, fare nuk dëgjohet. Ndyrësirat e disa këngëtarëve, vallë nuk janë fanatizëm, ekstremizëm e pse jo edhe helmim i rinisë sonë? Nuk ju brenë, mungesa e vullnetit për njësimin e abetares në nivel mbarëkombëtarë, nuk ju brejnë ato vajza që çdo ditë e më tepër po ju tkurret minifundi nëpër shkolla, nuk ju pengon bandizimi i shkollave në Kosovë, nuk ju pengon korruptimi i profesorëve me rastin e organizmit të mbrëmjes së maturës, ekskursionit dhe fryrja e notave. Por jo vetëm kjo, mua nuk më pëlqen një mysliman i cili e quan veten i “pari”, e ne të tjerët çfarë jemi të “dytët”?! Madje nuk më pëlqejnë as ata të cilët vishen në të bardhë, apo një motër myslimane e mbuluar me shami në kokë, duke ecur me një çamçakëz në gojë, apo me një cigare gjatë rrugës. Nuk më pëlqejnë as ata të cilët duan ta edukojnë shoqërinë me shumë qime (të pakrehura e të stërdredhuara) në fytyrë, madje as fizionomia e tyre gardorobike. Nuk më pëlqejnë as ata të cilët kryejnë ritualet fetare në një xhami, xhami kjo e cila është e mbuluar me rrjete merimangash. Këto janë disa nga problemet me të cilët duhet të merremi, e kurrsesi me cenimin e dinjitetit të vajzës shqiptaro-myslimane, siç është shamia (mbulesa).

Një fjalë e urtë thotë: “Unë nuk do të rezistoj, gjë që nuk bartë me vete pëlqimin tim”. Por as që tentoj për t’i bindur të tillët për një gjë të tillë, nga fakti se është e drejtë e tyre ekskluzive.

Sidoqoftë, bija, motra, nëna shqiptaro - myslimane “me shami pa shami” le të bëhet shkencëtare e pavarur!!!

•  
•